Vietnam vok ihsin thok Siberian ih cinghnia pawl thleng, minung pawl in a hraangzetmi le a heerzetmi rannung pawl fim le dai teih an um theinak dingah an hrem, an zirh in an kilkhawi thei. Minung pawl in zawng (monkey) pawl cu an cangvaiter ih sumsaw hawlnak ah an hmang asilole zukneng tla an kut keu dingin an zirh thei. Tirhthlah James ih a sim bangin, "Minung in ramsa hmuahhmuah hrem thei lomi a nei lo; hramlak ramsa le vate pawl siseh, bokvak ih a vakmi ramsa le ti sung nga pawl siseh, a hrem thei ṭheh a si," a ti (Jeim 3:7).   Asinan kan hrem thei lomi thil pakhat a um. Kan zate in kan buaipimi cu thil fatezet "lei (tongue)" timi ih in uk hi a si. James in, "Kaa sungih lei cu a hrem theitu ngaingai zohman an um lo," a ti (c. 8).   Ziangruangah si pei? Ziangahtile kan ṭongkam pawl cu leizim ih an um ruangah a si, a hrampi cu kan sunglam nun thukpi sungah a si. "Kan thinlung sung ihsin a suakmi thu kha kan hmurka le kan lei in kan ṭong suak (Matt. 12:34). Cule kan lei cu ṭhatnaklam le siatnaklam ah hmun hnih in kan hmang thei veve (Jeim 3:9). Mifim Peter Davids in, "Khatlam kam ah lei cu biaknaklamzet a si thei nain khatlam kam ahcun Pathian ziangsiar lo a si thei" a ti.   Thangṭhatnak ṭongkam le camriamnak ṭongkam cu kan kaa pakhat sung ihsin a suak (c. 10). Pathian zaangfahnak in cuti ding cu a si lo. Bawipa in kan lei kilvengtu a ret ding. "Maw Bawipa, ka kaa ah kiltu re awla, ka hmur ih sangka ah vengtu re hram aw (Saam 141:3). Pathian cun hrem theih lomi kan lei kha in hrem sak thei a si.                                                                                                 Dave Branon   Na lei kilkhawi thei dingin Na thinlung Jesuh kilkhawiter aw.