"Thluak khuaruahnak (intellect) le thinlung tuarnak (emotion) an do awknak hmun ah, thinlung in a maksak deuhmi fimnak a nei," ti'n "A General Theory of Love" timi cabu ngantu in a ngan. Ahlan ih an rak sim ṭheumi cu, thinlung cu thluak khuaruahnak in a uk ti a rak si, asinan science fimnak in tuni ah a hmuh suakmi cu cumi thawn thu linglet a si: "Zo kan si ih zo vek kan silai ding timi cu zo si kan duhdawt, timi parah a ṭhum aw a si."   Cumi thawn a bang awk ziktemi Ca Thianghlim ih a cohlanmi cu khuahlan thutak a si ih, hmuh suak tharmi a si lo. Pathian in a minung pawl hnenih a pekmi Thukham thupibik sungah thinlung cu a saangbik hmun ah a ret, ti kan hmu thei. "Bawipa na Pathian cu nan thinlung zate, nan nunnak zate le nan thazaang zate in nan duhdawt pei" (Daan. 6:5). Thuthangṭha Marka le Luka kan zoh tikah Jesuh in khuaruahnak (mind) timi ṭongfang a bet ti kan hmu thei (Marka 12:30; Luka 10:27). Curuangah atu ih scientist pawl ih an hmuh suahmi pawl cu Bible in a rak sim cia zomi pawl a si.   Khrih zumtu pawl in kan duhdawt mi ih thupit zia kan thei ve. Thukham tumbik kan thlun thei caan ah le Pathian cu kan duhbikmi a si caan ahcun tumtahnak saangzet kan nei thei ih ka khuaruahnak asilole kan thazaang cahnak khal atak in kan ngah thei ding ti'n kanmah le kanmah rin-awknak kan nei thei. Pathian kan duhnak in kan thinlung a ciahneh tikah kan thluak khuaruahnak khal in Amah rian dingin a hmuitin ve, ih kan tuah kan ṭuannak pawl khal a kau sinsin ih vanram (heaven) thu lawng ruat loin hih leiram (world) kan nun sung hrimhrim ah A Hmin sunlawinak in kan nung thei a si.                                                                                     Julie Ackerman Link   Pathian duhdawtnak ih na hman lomi ni pawl cu Na sunralmi ni pawl lakah siar tel cih aw. –Brother Lawrence