Pathian Ṭongkam cu kan hnenah pianzia phun tampi in a ra thleng. Bible sirhsan thuthangṭha simmi ngainak, Ca Thianghlim siarmi ngainak, thangṭhat hla ngainak, burte Bible zirzoinak, le Nitin Manna cahram tawite siar ih thazaang laaknak tivek pawl ihsin Pathian thutak cu kan hnenah a thleng thei. Asinan cumi pawl lawng si loin kanmahte rori Bible siar le zirzoi hi daithlang lo a ṭha.   Tunaite ihsin ka thinlung i thamzettu cu Daanpeksalnak Cabu kha tluankhat hnu tluankhat cipciarzet ih zirzoinak le Jesuh ih Tlangpar Thuzirhnak (Matt. 5-7) thawn siartonnak hi a si. Himi pahnih sungah kan zumnak thuhrampi pawl a um: Thukham Pahra (Daan. 5:6-21) le Khrih ih Tlangpar Thuzirhmi (Beautitude) (Matt. 5:3-12) pawl an si. Daanpeksalnak in Thukam Hlun – Pathian ih Daan cu a minung pawl ih an thlun ding a duh thu a langter. Matthai sungah, Jesuh in Daan famkimter dingih ra a si zia le Daan ih phurrit ihsin in luattertu ding Thukam Thar ih thuhrampi pawl dinsuah dingih a rat thu in sim.   Thlarau Thianghlim cu Pathian Ṭongkam ihsin kan nunnak sungah thutak in zirh dingin, huham in neihter dingin, theihternak nei dingin, sualsirter dingin le thianhlimter dingah a ra thleng. Cumi in a rahsuahmi pawl cu theihthiamnak, sualsirnak, tharthawhnak, le Jesuh sungih tthanlen pitlinnak pawl hi an si.   Theologian Philip Jacob Spener in, "Innsang ah Pathian Ṭongkam kan hnenih a um deuhdeuh asile zumnak le a rahsuah kan langter thei deuhdeuh ding," ti'n a ngan. Saam hla ngantu thawn thlacam tlang uhsi: "Na Daan sungah mangbangza thudik ka hmuh theinak dingah ka mit cu vaangter hram aw!" (Saam 119:18).                                                                                                             David Egner   Pathian Ṭongkam kan hnenih a um tikah, Kan nunnak ihsin a luang suak.