Rualpi ṭha ka neihmi pakhat cu Montana ih a ong awzetmi tlolak hmuan-duum kauzet pi sungah zalenzet in a um. A inn fehnak lamzin tluan cu tlangpar hramlak ramro ramcaar lakah caan sau ngaingai feh ṭul khi a si. A inn thleng dingin motor na mawng asile caan reipi cu lamzin kelkawi le leenkolh pawl na hmu vingvo dingih a inn kiangte na thlen tikah thingkung hring dildel le hanghnah hangrah pawl na hmu ding. North America ih tiva mawizet tampi lakih tiva pakhat cu a Loram sungah a luang ih cuih tiva kap ih a khomi thingkung pawl ih hram cun a cem thei dah lomi tidai an dawk ngah ringring.   Himi cu prophet Jeremiah ih a langtermi, Bawipa a rinsantu pawl ih nunnak cu "Tiva kiang ih a khomi thingkung, a hram tidai a thlengmi thingkung bangtuk a si," a timi vek a si (Jer. 17:8). Mi tampi cu Pathian hnen ihsin tlaan in a saami le harsat buainak sungah an taang, asinan Pathian a rinsantu pawl cu an hnah a hring ringring ih rah ṭha an rah. Bawipa hngatsan cu Pathian ṭhatnak sungah thingkung ih hrampi in tiva sungih tidai a dawk ngah ringring vek khi a si. Kannih cu hnangamnak in thazaang cakter ringring mi kan si ih kan parih duhdawtnak a neihmi cu ziangtik caan khal ah cem ni a nei lo.   Pathian in ziangtinkim hi a ṭhabik in a tuah. Amah in kan harsat zonzaih tuarnak cu hmailam ih kan nunnomnak dingah a canter. Pitling nun kan neih theinak dingah a ro a caarmi leiram ah rah ttha a rahmi thingkung bangin rethei zonzaih kan tuarnak hmun ihsin Khrih hrangih rah ttha kan rah theinak ah a canter ding ti rinsan aw.                                                                                                             Joe Stowell   Pathian ih ṭhatnak tiva sungah na nunnak hram bun aw.