Ka nupi cu nau-um ih a um rerolai ah kan tupate pahnih cu leknak zuklem (toy) pakhat cuh aw in an buai. Hmakhat te'n a nauta sawn (kum thum mi) cun a upa cu awkaa hro in thu a pek: "Cameron, na khaan sungah feh aw," ti'n. A upa cu tikhuarkho khin a khaan sung lut dingih a umlai ah kan nu in, "Cameron, na khaan sungah lut hlah. Nathan cu na boss a si lo!" a ti. Cumi theih fiangnak in ziangkim a thlengh danglamter ih Cameron cu hni phah in a to ih a lek saal.   Jesuh Khrih ih dungthluntu kan sinak ah kan nun a kekkuai taktak ih sualnak sungih kan tlaknak ruangah kan tupa nauta sawn pa in thuneihnak (authority) dik lo a hmanmi vekin boss dik lo tangah kan taang thei. Sualnak in kan thinlung le kan khuaruahnak pawl a uk thei ih Rundamtu Bawipa thawn kan pehzom awknak ih lungawinak tla hlo thluh dingin in silhkhuh sakin in hringhro thei a si.   Sikhalsehla Jesuh Khrih ih thihnak le thawh saalnak thawngin cuih satan ih hringhronak cu a cemter zo. Sualnak in zumtu kan parah zianghman thu a nei thei nawn lo. Paul in, "Sualnak cu a lo uktu bawi si nawn hlah seh, ziangahtile daan (law) hnuai ah nan nung nawn lo; Pathian zaangfahnak (grace) hnuai ah nan nung zo" a ti (Rom 6:14).   Thinlung kekkuai ih kan umlai ah, Khrih ih zaangfahnak in Pathian lungawitertu in siter ih leilungpi ah kan nunnak thlenghtertu huham cahnak neitu a si zia a langter. Sualnak cu kan boss a si nawn lo. Atu ah kannih cu Jesuh ih zaangfahnak le umpinak tangah kan nung. A huham in sualnak ih sal sungin in luatter.                                                                                                                                                                                                                           Bill Crowder   Pathian cun kan thinhar caan ah in hneem, misual kan si cingin in cohlang, ih kan kekkuainak in tuamhlawm.   – Scotty Smith