Suah ni cam pawl hi duhdawtnak langternak hrangah ka hmang ṭheu. Kum (5) kimnak suah ni lungawithu simnak kan tuah lai ih ka rualpi pawl in kan inn hmai ihsin in rak hngak rerolai caan tla ka vun mang lai. Kei cu ceimawinak bawlung pawl, suah ni laksawng pawl, le birthday cake tivek pawl parah ka thin a thir ciamco lemlo. Ka lung a awinakbik cu kum (4) nauhakte ka si nawn lo, ka upa vingvo ve thlang, timi parah ka lungkimzet sawn.   Sikhalsehla ka kum a upa deuhdeuh ih suah ni lomnak puai pawl in ka lung in awiter thei nawn lo hlei ah thinharnak lamlam in pe sawn thlang in ka thei. Kan dung kum ka suah ni lomnak ah ka nupi Martie in na tar deuhdeuh thlang sokhaw ti i theihter phah in i hnam. Cule Saam 71 sungih Saam cangantu in kumtluan Pathian ih a umpinak thu a simmi pawl kha i siar sak. "Ka suah thlak ihsin Nangmah in i hum zo" a ti (Saam 71:6), ih Pathian hnenah lungawithu a sim. "Maw Pathian, ka nauhaklai ihsin Nangmah in i zirh zo; Atu tiang Na thiltuahmi mangbangza cu ka sim a si," a ti (c. 17). Cule a tar vingvo tikah, "Maw Pathian, a tar zo ih a ṭuak a par tiah in dungtun hram hlah aw. A ra dingmi san thar hnenih na huham le na cahnak ka aupi tikah ka hnenah um hram aw," a ti (c. 18). Pathian in amah a rinsantu Saam cangantu ih nunnak kum tluan ah a umpi ih thluasuah bawngmal a sawm ringring a si.   Atu ahcun ka suah ni pawl cu Pathian ih rin-umnak in mangter saaltu an si. Cule ka suah ni lungawithusimnak pawl cu ka hnenah catbaang loih i umpitu Pathian hnenah i naihtersintu an si.                                                                                                             Joe Stowell   Na suah ni tinte'n thluasuah tampi na donmi siar aw.