Ka pasal lungnat besia (heart attack) a ngah hnu zarh tam nawn a rei ah a nunnak a zuah hrihtu Pathian hnenah lungawithu kan sim ṭheu. Thla tam nawn a rei tikah thusuhnak tampi ka tong ṭheu. Cutikih ka thulehnak cu a olte: "Pathian thluasuah ka dong, Pathian ih thluasuah mi ka si ti'n ka ruat aw," ti vial lawng hi a si ṭheu.   Sikhalsehla thluasuahnak timi hi pianzia a phunphun in le a tuum a seen a phunphun in kan hnenah a ra thleng ṭheu. Ngaingaite cun, thluasuah a si, ti'n kan theithiam ringring lo. Ziangkim kan tuahnak ah le harsatnak kan tuarlai caan hmanah Pathian in ziangmi si tuahter in duh ti kan thei lo. A caancaan ah Pathian in kan duh daan in kan thlacamnak in let lo, a khul a fuungtuk ti'n kan ruat ṭheu.   Himi vek thuhla umtu daan hi Joseph ih nunnak ah kan hmu thei. Milailam thlir daan cun Pathian in a hngilhsan zo ti ding tlukin a um. Kum hrabu (one decade) lenglo Joseph in harsat buainak a tong. Khur sungih thlak a tuar, sal ih zuar a tong, thuphanpuh a tuar, dik lozet ih thawngthlak a tuar. Asinan a netabik ahcun Pathian ih rin-umnak cu a parah a langih Egypt rampi uktu bawi upa dinhmun ah khaisan a si ih mangṭaam a tlun tikah mi tampi ruuntu ah a hung cang (Seem. 37-46). C. S Lewis in, "Thluasuah pakhat kan sungral tikah rin lopi in cumi can ai ah thil dang thluasuah kan si ṭheu," a ti.   Pathian in Joseph ih parah a thluasuah peknak kutcak a langter ringring. Cumi cu Amah a rinsantu pawl parah tla a si ringring ve. "Maw Bawipa, Na maksaknak ih a mawi zia cu!"                                                                                                                                                           Cindy Hess Kasper   Lungawinak taktak cu Pathian cu a ṭha ti theih hi a si.