Tuni ah an sim tamzetmi cu kan harhdamnak ṭhangso dingin siibawi in kan natnak a hmuhmi thu harsa in sim hmanah a ṭhalam ih thuruah theinak mizia neih ding, timi hi a si. North Carolina University ih psychology professor Barbara Fredrickson, PhD in, lungawitertu cangvaihnak pawl nei ding, lungawi te'n um ding, duhdawtnak nei ding, le a dang a ṭhalam ih thuruat theinak pawl neih a ṭul, ti'n a sim. Cumi pawl cu kan thei cio ko, asinain cumi hnakih thupi sawn lungawinak, thlangamnak le duhdawtnak ih hrampi a simi kan hngatsan dingmi Pathian kan theih a ṭul.    Saam 37:1-8 siarnak in a ṭha lolam ih thuruatnak le thinharnak kan neihmi damternak, le a ṭhalam ih cangvaihnak in neihter thei. Hih thinlung caktertu pawl hi ruat hnik: Bawipa cu rinsan awla thil ṭha tuah aw. Cuticun hih ram sungah himdam tein na um ding (c. 3); Bawipa ah na lungawinak hawl awla na lungthlitum a lo pe ding (c.5); Bawipa ih hmai ah dai te'n um aw, ninghang in um hlah (c. 7); Na thinheng hlah! Na ai khal thok hlah! Na don tla har hlah! (c. 8).   Ziangahtile himi pawl cu "Bawipa ih sungah (in the Lord)" timi thawn pehtlaih awknak an neih thluh. Hih khihhmuhnak ṭongkam pawl cu minunglam ih suakmie khuaruahnak men an si lo. Himi pawl cu Bawipa Jesuh ah hrambunmi an si ih Amah ih cahnak huham ruangah thil cang theimi hlir an si thluh.   Kan hrangah a dikmi thuhla a ṭhalam ih ruah theinak thuhrampi cu Jesuh Khrih sungih Pathian ih in tlennak hi a si. Amah cu kan ruahsannak ih asan (reason) umsun a si!                                                                                                 David McCasland   Thuthang sia (bad news) a um tikah, Kan ruahsanmi cu Jesuh ih thuthangṭha (good news) a si.