Paisa ih a lei thei lomi thil pawl an um – asinan tuni ahcun cumi pawl cu an tamtuk lemlo ding," ti'n Michael Sandel in, "What Money Can't Buy" timi a cabu sungah a ngan. Mi pakhat in thawng-inn sungah khaan nuam deuh kha $90 in a lei thei, ih na doctor ih cell phone number tla $1500 in a lei thei. Cumi cun "ziangtinkim zikzik hi lei theih in an um a bang," timi a langter.   Sikhalsehla, paisa ih lei theih lomi cu tlennak (redemption) – sualnak sal sung ihsin luatnak dingih in rundamnak hi a si. Tirhthlah Paul in Pathian in Jesuh Khrih thawngin kan rundamnak hrangih a khuakhannak ih um zia le a maksak zia pawl ngan a thawh tikah, a thinlung cu thangṭhatnak in a khat: "Ziangahtile Khrih a thihnak thawngin kan sualnak cu ngaidam a si zo ih a luat mi kan si zo. Pathian in a zaangfahnak cu kan hnenah tamzet in in pek ruangah, a zaangfahnak cu a va tum lawmmam so!" a ti (Efesa 1:7-8).   Jesuh thinglamtah parih a thihnak cu kan sual man thihnak kan tuar dingmi ihsin in tlen saalnak dingah a man a pekmi a si. Cule himi cu Amah lawng ih pek theimi a si, ziangahtile Amah cu a famkimmi  Pathian ih Fapa a si ruangah. Cuih luatnak sunglawi cu kan cohlan tikah a man a khungzetmi zaangfahnak a si ti thei fiang in kan thinlung takin catbaang loin thangṭhat ringring ding kan si.   Culawng si loin Jesuh thawngin in tlen ih kumkhua nunnak in petu Pathian cu pumpeknak thawn sunloih ringring ding kan si.                                                                                                   Marvin Williams   Jesuh ih thihnak lawngin kan zalennak a lei thei.