Tuluk thufim pawl hi menmente an si ih an dunglam ah thuanthu an nei ṭheu. Thufim pakhat, "faangcang kung pakhat a ṭhannak bawm dingin a hram in dirso aw," ti a si ih cumi cu Song Dynasty sanlai ah mi thintawizet pakhat ih thu a si. Amah cu a faang ciinmi pawl kha zamrangzet ih ṭhanter a duh. Curuangah a ti daan ding thu a ruat cat. Faangcang kung pawl kha letmah malte ciar a dirso. Cuti ih a tuah hnu a thaisuun ah a faangcang lo cu a va haal. A thlairawl pawl an "ṭhang" saang deuh, ti'n a hmu ih a lungawi. Asinan a lungawinak cu caan tawite sung lawng a daih. A thaisuun ah faangkung pawl cu an rocaar thluh, ziangahtile an hram a thuuk nawn lo ruangah.   2 Timote 2:6 sungah, tirhthlah Paul in thuthangṭha simtu cu Lothlotu ih hnaṭuan vekin a tahṭhim. Timote hnenih tha a peknak ah, Lothlotu bangin Khrih ih dungthluntu cun taimakzet in hnaṭuan ding. Lei na let, thlaici na ciing, na hngak, asinan an ṭhannak dingah caan laak a ṭul. Tuluk thufim tahṭhim bangin manmawhtuknak cun rah ṭha a suah thei lo. Bible simfiangnak ngantu William Hendriksen in, "Timote in ... Pathian ih a pekmi thlaraulam hnaṭuan kha thungai thlakin le pumpe in taimakzet in a ṭuan asile midang pawl ih nunnak ah Galati 5:22, 23 sungih tarlangmi thlarau rah sunglawi pawl an rah thokmi kha a hmu ding a si," ti'n a ngan.   Rin-umzet in Pathian hna ṭuan in a ṭhantertu Bawipa ih kutcak thinsau te'n hngak ding a si. "Thlaici a tuhtu le tidai a toihtu cu an thupi lo. A thupibik cu Pathian a si, ziangahtile thlaikho a ṭhantertu cu Amah a si" (1 Korin. 3:7).                                                                                                   Poh Fang Chia   Kannih in thlaici kan tuh, Pathian in thlairawl a suah.