Ka nupi Janet in Dreadnought D-35 guitar ṭhazet ka kum 65th kim suahcam laksawng ah i lei sak. 1900s tuan deuh kum hrawngah hih Dreadnought style guitar design cu suah thok a si ih cumi sanlai ih design dang pawl hnakin a aw a ṭha sawn, a ring sawn ruangah a laarzet. Cumi cu Leitlun Ralpi Veikhatnak ih British battleship HMS Dreadnought hmin laak ih hminpek a si. D-35 ih dunglam pianzia cu phundang te a si. Kut zung thiam pa in a ṭhazetmi rosewood thingpheng kaupi a ngah thei lo ruangah thingpheng fate pathum a komkhawm tikah hi vekih a aw ṭha cuang ih a suah theinak a si.   Pathian ih kutsuak cu guitar design mawizet thawn an bang awk. Jesuh in a kekkuaimi pawl kha a komkhawm ih Amah thangṭhattu dingah a laak hngai. Jesuh in ngunkhuai khong hnaṭuantu pawl, Judah ram thlengh awknak hrangih cangvaitu pawl, ngakaitu pawl, le mi dangdang pawl kha dungthluntu dingah a tuah. Cuti'n kum zabu sankhat hnu sankhat mi phunzakip kha a hruai khawm vingvo. Tirhthlah Paul in, "Amah Khrih ih uknak hnuai ah taksa ruang parih ṭhen dangdang pawl cu rem tein an pehzom khawm aw ṭheh. Hlikhlok le ruhcaang pawl in taksa ruangpi cu hmunkhat ah an khaikhawm aw ṭheh. Curuangah taksa ruang parih tthen dangdang cu anmah ih hnatuan ding ciar an ttuan tikah taksa ruangpi cu a zate in duhdawtnak in a ṭhangso a si" (Efesa 4:16).   Bawipa ih kut cak sungah mi phunzakip cu hmunkhat ah komkhawm aw a si ih Pathian thangṭhat dingah le midang pawl riantu dingah a nasazet le thiltithei pawlkom dinsuah le sersuak a si ding.                                                                            Dennis Fisher   Kanmahte lawng hnakin a bur in hmunkhat te'n hna kan ṭuan tlang asile thil tampi kan ti thei sawn.