Beep, beep, beep, beep! Tlangleeng sangka kan khar thlang ding, tiih awnring le meitleu ralrin peknak aw a si. Cucing in mi hrekkhat cu platform parah tlan le zuang in tlangleeng parih kai an tum rerolai. Sangka pakhat cu an khar thlang. Vanṭhat ah mi pakhat cu sangka in a rial ngah zik leuleu na'n cep ngah lo deuh fangin him te'n a lut ngah. Ka mangbangzetmi cu ziangruangah minung pawl hi hitluk lawmmam in an ngamhuai (risk) duh rero si pei, a rei hlan minute 4 ah tlangleng dang a ra thleng ko ding na'n sikhawh, ti'n!   Cumi hnakih thupi sawnmi saangka a um, ih an khar hlan ih kan lut ngah rori a ṭul. Cumi cu Pathian ih zaangfahnak sangka a si. Tirhthlah Paul in, "Ngai hnih uh! Pathian mit-hmai ttha ngah caan cu tuih caan hi a si; rundamnak co ni cu tuni hi a si," a ti (2 Korin. 6:2). Khrih leitlun ah a ra, kan hrangah thihnak a tuar ih thlaan ihsin a tho saal. Pathian thawn rualremnak kan ngah saalnak dingah sangka in ong sak zo ih rundamnak kan co ngah ding ni tla a simthan zo.   Tuni hi rundamnak co ni cu a si. Asinan nikhat ni ahcun zaangfahnak caan a cem dingih sangka an khar ding. Khrih a cohlangtu le a riantu pawl hnenah, "Ra uh, Ka Pa ih thluasuah mi pawl, nan hrangih ka timtuah ciami vancung uknak sungah rung lut uh" (Matt. 25:34). Asinan Amah thei lotu pawl cu a tlansan hngai ding a si (c. 46).   Jesuh Khrih kan lehrul daan ih zirin kan nun cemnetnak cu a si ding. Tuni ah Jesuh in in sawm, "Keimah cu sangka ka si. Zokhal Keimah ihsin a luttu cu rundam an si ding," a ti (Johan 10:9).   Poh Fang Chia   Pathian ih innsang sungih lut dingah Tuni hnak ih ni ṭha sawn dang a um lo