Michigan ih snow tlak caan ah ka tule pawl thawn plastic leeng to in kan inn dunglam hmunsuk ih tolh khi ka nuam awkzet. Second 10 hrawng a suklam ah kan tolh ih cule a solam ah kan kai saal lala.   Alaska ah tleirawl pawl thawih khual kan tlawn tlanglai khal ah vur parah leeng kan to ciamco dah. Bus in tlangzim thleng zikte tiang kan leeng thawn in phurso. Vur par feh theimi leeng parah kan kai ih cuti'n minute 10 in 20 sung (kan ralthat le ngam daan ih zirin) hmunsuk hraapzet ah kan leeng cu cakzet in kan mawng ciamco.   Chicago ih kan inn dunglam ahcun second 10 sung te lawng asilole Alaska ahcun minute 20 sung rori vur parah leeng kan to. Cumi cu an pahnih in vur parih leengto ti a si veve ko na'n a caan a bang awk lo.   Himi hi thlacam thawn pehparter in khua ka ruat ciamco. A caancaan ahcun kan hmuancar ih second 10 vur parih leengto vekin thla kan cam – zamrangzet, mit-thep-karte sung thlacamnak asilole rawl ei hlante ih lungawithusim thlacamnak kan neihmi vek khi a si. Cule caan dang ahcun Alaska tlangzim ihsin hmunsuk saupi ah caan reipi vur par fehmi leeng kan to bangin kan thlacamnak cu kan sauter deuh, Pathian hnenah kan thinlung reipi hmasuan in pehtlaihnak kan nei ih thuhla tampi dil le ngen in thla kan cam. Cute pahnih cu anmah le zawn ah an dik veve ih kan nunnak hrangah an thupizet veve.   Jesuh cu atu le atu thla a cam, ih a caancaan le reipi a cam (Luka 6:12; Marka 14:32-42). Ziang a va si hmanah a thupimi cu, kan thinlung takin Pathian hnenah caan tawite sung siseh, caan saupi sung siseh, Amah rinsannak taktak thawn thla kan cam ding hi a si.   Dave Branon   Thlacamnak ih thinlung cu thinlung takih thlacam hi a si