NITIN MANNA   2019 January 29 Tlawngkai Nihnih   In Bawmtu Bawipa   Keimah bomnak cu Bawipa ih hnen ihsin a ra; Lei le van tuahtu Bawipa ih hnen ihsin.  – Saam 121:2   Kum kul mi Lygon Stevens, tlangpar kailam ih tontehnak neitu nu cun Mt. McKinley, Mt. Rainier, Ecudor ih Andean tlangsang pawl ih luzim a thlengh thluh zo ih Colorado ram ih tlangsaang 39 pawl ih luzim a thleng ṭheh. Cumi nu in ziang a sim tile: "Tlang par ka kai, ziangahtile tlang pawl ka duhdawt ruangah, cule cutawk hmun ah Pathian ka tong" a ti. 2008 kum January thla ah Lygon cu Colorado thlanglam ih Little Bear Peak tlang parah a naupa Micklis thawn an kai rerolai ah tlangzim ihsin vur tikhal luangmi ruangah a thi.   A nu le pa cu Lygon ih thlaraulam tontehmi a ngankhumnak journal an hmuh tikah Jesuh Khrih thawn pehtlaih awknak nei ih an feh tlang zia an theihmi in an hna a ngamterzet. A nu in, "Lygon cu a Bawipa thawn thukzet le duhnungzet in catbaang loin an um tlang ringring, thlaraulam in mi pitlingzet pawl ih rinnak hnget caan saupi an neih vekin. Curuangah Bawipa hrangah a tleu ringring," ti'n a sim.   Lygon ih netabik journal nganmi cahmai a thoknak ah, a thih hlante nithum duh ah bukte sungih a nganmi cu: "Pathian cu a ṭha, Amah in kan nunnak hrangah khuakhanak a nei. Keimahte ka khuakhannak hnakih ṭha sawn in thluasuah i pe. Curuangah ka lung a awi. Bawipa, Na parah ka lung a awi, ziangahtile himi dinhmun i thlenter ruangah. A taanglaimi ka nunnak – ka hmailam caan – hmuahhmuah tla na kut sungah ka lo ap, ka lungawituk" ti'n a si.   Lygon ih Pathian rinsannak ṭongfang pawl cu, Saam cangantu ih, "Keimah bomnak cu Bawipa hnenin a ra. Lei le van tuahtu Bawipa hnenin" timi ihsin a rami a si (Saam 121:2).   - David McCashland   Kan theih fiang lomi kan hmailam caan hrangah ziangkim thei thluhtu Pathian kan rinsan thei