Nitin tein highway ah zungkai le zungttum in mawtaw ka mawng ringring, ih nitin tein thin hnaihnoktertu pawl ka hmu ngah ringring. Cu pawl cu mawṭaw mawng phah in telephone an biak asilole cakuat (texting) an tuah phah. Mi hrekkhat pawl cu thuthangca tla an siar phah, make-up tla an hnih aw phah ih rawl tla ei phah in nazi pakhat ah peng 70+ cak in an mawng! A caancaan ahcun thinharnak cu hmakhat te'n zohman siatsuah loin a reh thei. Sikhalsehla mawṭaw cakzet ih mawn rerolai ahcun midang thihnak ah tla a cang thei.   A caancaan ah thinharnak pawl cu Pathian thawn kan pehtlaih awknak sungah buainak a suahpi thei. Cumi cu Jesuh le Martha ih pehtlaih awknak vek khi a si. Martha cu hnaṭuan tampi nei in a thin a ṭeu. A helhkamnak le awloksongnak cu ei-in ding tawlrelnak ah a si (Luka 10:40). Jesuh hnenah, "Bawipa, ka naunu in hnaṭuan hmuahhmuah i tun ṭheh hi na poisa lo mawsi? Sim aw, i ra bawm seh! ti'n a phunciar. Cutikah Jesuh in, "Martha, Martha! Nang cu thil tampi parah helhkam le awloksong in na um; a ṭul ngaingaimi cu pakhat lawng a si. Cumi cu Mary in a hril ngah ih zohman in an long nawn lo pei," tiah a ti (cc. 41-42).   Martha ih thinharnak cu amai' duhhrilnak a si. Asinan a sunralmi cu Jesuh ih thusim ngai le a umpinak sungah lungawi thlangam teih um ding caan ṭha khi a si. Bawipa cu kan caan ṭha sunglawi pe ih pawlkom dingah a tlingtlak hrimhrim. Amah lawng hi kan thinharnak pawl neh theinak thazaang in pe theitu umsun a si.   Bill Crowder   Riahsiat na duh le na sunglam zoh aw; Thinhar na duh le na kiangkap zoh aw; Thlangam na duh le vanlam zoh aw