NITIN MANNA   2019 January 27 Zarhpi Ni   Pathian ih Kutcak   Ka nunnak in Nangmah a lo pawl, Na vorhlam kut in i himter.    – Saam 63:8   NASA in vanpar zohnak telescope thar hmangin spectrum tleunak zoh a thok peklai ah, hliakhlaitu pawl cu zuk pakhat an hmuhmi ruangah an lau thluh. Cumi zuk cu minung ih kutzaphak vek a bang, zungpi le zaphak cu mepian rong, panzawng, ahring le sui rong a si. Mi ṭhenkhat pawl in cumi cu, "Pathian ih Kut" ti'n hmin an sak.   Pathian cu a fahniang pawl ih kan poiṭul caan ah A kutcak ih in bawm dingin a man ringring, timi thutak hi Ca Thianghlim ih sim duhmi muril a si. Saam 63 ah: "Ziangahtile Nang cu in bawmtu na si ringring; Na thladem hnuai ah lungawi in hla ka sak. Ka nunnak in Nangmah a lo pawk, Na vorhlam kut in i himter," ti'n a um (cc. 7-8).   Saam cangantu in Pathian ih mi bomnak cu minung kut in kaihruai vekin a langter. Bible thiam hrekkhat pawl in hih Saam hla hi David siangpahrang in a fapa Absalom ih a do, that dingih a hual rerolai, mangbang vansang le harsazet in Judah ram ramcaar lakih a tlan rerolai ih a nganmi a si, an ti. Absalom in a pa ih siangpahrang tokham lon a tum, ih a pa thah a tum ruangah David cu ramcaar ah a fapa ttih in a tlan (2 Sam. 15-16). Hitluk ih harsat caan hmanah Pathian cu David hnenah a um ih David cun Pathian a rinsan thei. Hiti'n a ti: "A hmunmi na duhdawtnak cu nunnak hnakin a sunglawi sawn; curuangah ka lo thangṭhat ding" (Saam 63:3).   Kan nunnak sungah harsatnak tuar naazet caan a um thei, asinan Pathian in cuvek harsat caan sung khalah A kutcak in saan ringring. Pathian kutcak ih in bom ban lonak hmun a um lo.   - Dennis Fisher   Pathian in leilung ih thilrit a liang in a phur ih, A fahniang pawl cu a baan in a pom