Kan nu cu zing te'n a tho ringring ih midang thawh hlanah daihrial caan (quiet time) laakin Bible siarnak le thlacamnak in caan a hmang ringring ih a nuam awzet. Tunaite ah a duh cuangmi tokham a laaklai ah zaan hmaisa ih bawlungsit zohtu in hnawm pawl a taantami a hmuh tikah a thinlung a hnaihnokter ih a lungawinak hmuah a hlohter ṭheh.   Cun ruahnak pakhat in a nunnak cu a run ṭhawng ngah, ih mileng khan tokham settee umnaklam ah a va thawn. Cutawk ihsi cun kan inn hmailam ih sangkate ihsin Atlantic Ocean tlun ih Nisuak tleu mawi a hei hmu thei. Cumi zing ah Pathian ih sersiammi zoh mawizet khur le ram (scene) a hmuhmi in a thil hmuh daan a thlengh danglamter.   Thuanthu in simmi in kan nupa in khami zing ih thil umtu daan ihsin zir ngahmi lesson kan nei veve ti kan thei aw. Kan nunnak sungih nitin thilcangmi, kanmai' duh daan ih kan kilkhawi thei lo caan ah, duhhrilnak kan nei thei. Ka hmuhmi hnawm borhhlawh zoh in kan thin a hnaihnok thei, asilole kan thil hmuh daan kan thlengh danglam thei, timi thutak a si. Paul cu Athens khua a um lai ah, "cuih khua pi cu milem zuk hlirin a khat ti a hmuh tikah a thin a nau ngaingai" (Tirh. 17:16). Asinan a thil thlir daan a thlengh ih biaknaklam ih an thinlung ummi hmang tahrat in Pathian thutak – Jesuh Khrih ih rundamnak thutak phuannak ah a hmang (cc. 22-23).   Kan nu in hnawmbaal pawl taansan tahrat ih Nitleu mawi a hmuh vekin kannih tla kan thil hmuh daan kan thlengh danglam a ṭul. Bawipa, thil hmuh daan ṭha in neihter hram aw, ti'n dil uhsi!                                                                                                 Randy Kilgore   Fimnak cu thil ziangkim khi Pathian ih hmuh daan in hmuh thiam khi a si.