Mi pakhat in pension a la pekte mi a rual pa hnenah, atu hi hna na ṭuan nawn lo ih ziangsi na tuah ṭheu? ti'n a sut. Cu pa cun, "Keimah le keimah hi "vehvaitu" in ka ruat aw." Kan kawhhran sungtel pawl le kan khua sung mi siizung to pawl le putar le pitar zohkhennak ih um pawl, mahte lawng umhar lungleng ih umtu pawl, asilole biak le thlacam sak ṭul mi pawl ka va leeng. Cule cutiih ka tuahnak sungah ka nuam awzet!" ti'n a let. Ka rual pa cu hi pa ih tumtah thianghlim le midang a vehvai le a zohkhennak parah a lung a kimzet.   Jesuh an thah hlan ni malte duh ah, a dungthluntu pawl hnenah a ṭulsam mi pawl va vehvai ding a thupit zia langtertu thuanthu a sim. "Siangpahrang in a vorhlam kam ih umtu pawl hnenah, hnipuan nei lo ka si tikah hnipuan in pek; ka nat lai ah in tuamhlawm; ih thawng ka tlak lai ah in tuamhlawm," a si tiah a ti (Matt. 25:36). Cule miding pawl cun, "Bawipa, ziangtikah so na rilrawn kan lo hmuh ih rawl kan lo pek; na ti a haal kan lo hmuh ih tidai kan lo pek? Ziangtikah so mikhual na si kan lo hmuh ih kan inn ih kan lo tlunter? Hnipuan na neih lo ih hnipuan kan lo pek? Ziangtikah so na nat le thawng na tlak kan lo hmuh ih kan lo veh?" tiah an ti ding. Siangpahrang in, "Thungai in ka lo sim: hih ka unau pawl lakah nautabik parih nan tuahmi cu ka parah nan tuah a si," a ti ding (cc. 39, 40).   Mi vehvai hna kan ṭuanmi hin ṭhathnemnak cotu pahnih a nei – kan vehvai mi le Jesuh Khrih. Mi pakhat ih ṭulsamnak thinlung takih kan bom cu Bawipa direct ih rian kan si. Tuni ah thazaang pek ding le vehvai ding mi pakhatkhat tal na kiangnai ah an um maw?                                                                                                 David McCashland   Zawnruahnak timi cu midang ih harsatnak theithiam ih, an ṭulzet lai ih va bom duhnak thinlung neih khi a si.