Caad, Jaagorɗo halfinaaɗo jokkondire e leyɗe njanane follii hoore makko. Sherif Mohammaat Zeen. O hollii wonnde o teddinaaka e nder guwerneman Mahammaat Idriis Debi. Ko Sherif Mohammaat Zeen ardinoo jeewte newinɗe laatagol kaaldal e kawral wonaangal e waɗeede fewndo ɗoo Caad. Holko jonnitugol mo laamu makko battinta e ngal kaaldal ? Koɗo men hannde ko Hashim Buubakari Mohammadu, wiɗtotooɗo e baŋŋe dawro. Himo jaaboo lamnde Ibrahiima Timmbi Bah.

Gine, Kolonel Mamadi Dummbuya sosii fedde diisondiral e kawral hakkunde ginenaaɓe . E bi’ol makko ko nde moftunde ɓiɓɓe Gine fow. Ngal pellital hooreejo laamu faddewu Gine no yaadi e ƴamal pelle dawre e sosiyete siwil leydi ndin. Koɗo men hannde, ko Aamadu Wuuri BAH lollirɗo BAH Wuuri. Ko o gooto e dawroyankeeɓe Gine. E faandu haala Ibrahiima Timmbi Bah himo holla miijo makko e alhaali nden fedde kaaldal e kawral. O yewtii kadi ko yowitii e ñaawoore warngo 28 settaabur. Heɗoɗen mo.

Senegaal, Makki Sall hooreejo leydi ndin toɗɗike Aamadu BA hooreejo jaagorɓe. Caggal toɗɗegol mo, Aamadu BA fewnii guwerneman makko on. Holɗum haani wonude golle makko arane ? Oo guwerneman keso waawan ustude caɗeele senegalnaaɓe ? Ibrahiima Timmbi Bah yewtidii e Ibrahiima Aan, taskotooɗo kabaruuji. Heɗoɗen ɓe.

Mooɓondiral adunayankowal Pulaaku waɗii Wagadugu, Burkina Faso, gila 15 haa 17 lewru 9ɓuru 2022. Ndee jonnde tummbindirii yimɓe ɗuuɗuɓe jeyaaɓe e moftere Fulɓe ummiiɓe e leyɗeele Afrik e Erop. No jeyyaa e pellite ƴettaaɗe ɗen , haɓugol worindagol e doñugol yimɓe. Sosugol jonnde diisondiral ñiiɓunde e nder falnde hirnaage Afrik, tawtugol Pulaaku nguu e no egguɓe artira ka ɓe ummii ɗon, udditugol suuɗi janngirɗi ɗii e cuuɗi cellal. Ko holno pulaaku wallirta e saakugol jam e nder Sahel. Ɗee ɗoo fow no tawaa e toɓɓere yewtaaɗe e ndee rogere 4ɓere ngal mooɓondiral Pulaaku. E faandu haala Buubakar Boli, Porofeseer Iisa JALLO, tawaaɗo e ngoomu yuɓɓinɓe  ndee jonnnde no ɓeyda laɓɓinde pellite ƴettaaɗe, heɗoɗen mo.

Koɗo men hannde ko Dr Ibrahiima BARI, Burkinaajo heertoorɗo ndenaagu. Hooreejo laamu faddewu Burkina Faso, Pool Henri Sandawogo Damiba jippini walla follii jaagorɗo makko kalfinaaɗo ndeenaagu leydi ndii. Faandaare makko ko ƴettitude golle haɓugol kuliyankaagal e nder Burkina Faso. E bi'ol Dr Ibrahima BARRY, ngal pellital ina wondi e nafoore kono kadi ko faale hollude wonnde o seedii e laamu Rok Mark Kristiyan Kabore, hooreejo kiɗɗo. Keɗitoɗen yeewtere nde o waɗidi e Umaar Mammadu SOW.

Hakkunde Mali e Koddiwaar lurral ngal no jokki gila ɓee konunkooɓe iwarinaaɓe jaggaa Bamako. Hay si tawii rewɓe tato e ɓen accitaama. Kono gila nden kaaldal nggal alaa e sottude fii no heddiiɓe ɓen accitiree. Holko falli ngal kaaldal ? Tawu si darnde hooreejo Togo Foor Ñasinbe Iyadema no waawi waɗude haa paamondiral heɓoo hakkunde maɓɓe ? Abdullaay JALLO yewtidii e Dokteer Abdu BAH hertorɗo baŋŋe dawro e jokkondiral kala ko faati e Dental Leyɗe Hirnaage Afrik. Keɗoɗen mo.

Hooreejo laamu faddewu Burkina Faso Pool Henri Damiba caggal nde ɓe liɓɓi laamu ngun, njillu makko aranu ko e nder Mali, refti Koddiwaar e Niije, Ko waɗi o suɓii ɗen leyɗe ɗon tati e njillu makko aranu ?  Yalli faandaare nden ko semmbinde nanondiral hakkunde ngenndi leydi makko e ɗee leyɗe juuraaɓe? Aadama Kone jaaboo ɗen lamde Abdullaay JALLO

Hannde ɗoo e senegal koolaaɓe suudu sardiiji walla depiteeɓe no joɗɗinee. Kono oo sa’i ɗoo ko njoɓdi maɓɓe ndin wonaa e haleede fii mum e nder Afrik caggal bi’ol Martin Fayulu o lumndiiɗo mo RD Konngo. Holko woni golle maɓɓe? Mbella depiteeɓe e nder leyɗeele Afrik ko fotaaɓe yoɓeede fii no ɓe waɗira golle maɓɓe no haaniri non? Hara darnde maɓɓe no wondani jamaa on e nafa walla ngartam? Sheykh Umaar SI hertorɗo to baŋŋe sariya sarɗinkooɓe  no jaaboo ɗee lamnde e faandu haala Abdullay JALLO.

Yoga e leyɗeele Afrik baŋŋe hirnaange no heɓlaade fii udditugol duɗe (lekkolji) janngirɗe maɓɓe. Kono ngol udditugol no wonndi e caɗeele ngonnka e ngurndam. Sabu ndiyam toɓɓo ɗam hettii cuuɗi janngirɗi. Holi battane ɗum adanta ngol uddidgol? Kono kadi dadiiɓe lumndiiɓe e kuliyankooɓe no haljini ngol udditugol duɗe ɗen to Kamerun, Mali haa Najeriya. Holko ɗum battinta e jannde sukaaɓe ɓen. Ngam yewtude e dow ɗee ɗoo toɓɓe Abdullaay JALLO  bismiima Siley Gorbal Sih ardiiɗo kawtal pelle dillooje to baŋŋe jannde Senegaal. Keɗoɗen mo.

Nulaaɓe nduu suudu ñaawirndu adunyankooru wi'eteendu "CPI" no Gine gila e altene. Faandaare ngun njillu maɓɓe ko yewtidude e ardiiɓe laamu faddewu ngun fii no ñaawore yowitiinde e warngooji "28 septembre" newora. Gila ɗuuɓi sappo tati ko hondum tigi falli laatagol ndee ñaawoore? Yalli pottal heɓɓoto hakkunde lorriiɓe ɓen e tuumaaɓe ɓen e nder nden ñaawoore. Heɗoɗen ko Meeter Haamidu Bari ardiiɗo kawtal pelle Gine "CPI" e kadi ardiiɗo pelle daraniiɗe lorriiɓe e ɗii warngooji e faandu haala Abdullaay JALLO