Sa kasagsagan ng imbestigasyon sa Philippine Offshore Gaming Operators o POGO, nabisto na ang POGO operator sa Bamban, Tarlac ay gumamit ng market at barbecue vendors at call center agent bilang dummy incorporators. Habang sa flood control scandal, nabuko na ang ilang opisyal ng DPWH ay gumagamit ng mga construction company bilang dummy companies para sa flood control projects sa Bulacan. Dummy incorporators at dummy companies… Mga katagang naririnig uli natin sa ginagawang imbestigasyon naman ng Senate Committee on Agriculture tungkol sa agricultural smuggling. Noong Oktubre 2025 pa lamang, tinukoy na ni Sen. Kiko Pangilinan ang red flags ng pagkakaugnay ng iba’t ibang rice traders at importers sa iisang may-ari, na nakababahala dahil baka ang rice importation ay nasa kontrol lamang ng iilang traders na siyang nagbibigay sa kanila ng kapangyarihan na impluwensyahan ang merkado. Kung kaya’t ang tanong namin sa Department of Agriculture, partikular sa Bureau of Plant Industry na nagbibigay ng Sanitary and Phytosanitary Permit para makapag-angkat ng bigas: Ano ang basis o formula sa pagbibigay ng alokasyon ng dami ng aangkating bigas ng importer? Dahil ang tinutumbok ng komite ni Senator Pangilinan na kartel sa rice importation ay taliwas sa hangarin ng Marcos administration noong ibinaba nila ang taripa sa importasyon ng bigas. Sino ang pasimuno sa kartel na ito? At ang alokasyon sa importasyon ng bigas---isa na namang modus ng korapsyon? Think about it.#TedFailonAndDJChacha

Kulang ang pera ng gobyerno — iyan ang madalas sabihin ng mga opisyal ng pamahalaan kaya hindi mabigyan ng sapat na pananalapi ang mahahalagang proyekto at programa na totoong pakikinabangan ng mga mamamayan.Subalit lumabas sa mga pagdinig sa Senado kaugnay ng mga proyekto ng DPWH at flood control, at sa pagbubunyag ni Senador Ping Lacson, na trilyon-trilyong piso sa pinaghirapang pera ng mga Pilipino ang ninanakaw ng mga kawatan sa gobyerno nang walang kahirap-hirap at walang kapagod-pagod. At sa gitna ng napakakirot na katotohanan na ito ay kailangan pa nating mangutang para pondohan ang mahahalagang proyekto ng pamahalaan.Kailangan ding magpatupad ng mga Public-Private-Partnership para pondohan ang mga proyektong pangkalusugan, transportasyon at edukasyon na importante para sa mga Pilipino.Hindi lang pera o salapi ang ninanakaw sa atin ng mga magnanakaw sa gobyerno, kundi ang kalusugan, edukasyon, maayos na transportasyon at maunlad na bayan.Patuloy lang magpapagod at magpapakahirap magtrabaho ang pangkaraniwang manggagawa at middle class upang magkaroon ng ambag sa pagpapatakbo ng gobyerno, habang magpapatuloy lang sa pagpapayaman ang mga korap. Think about it.

Malinaw na isinasaad sa ating Konstitusyon na ang mga miyembro ng dalawang kapulungan ng Kongreso ay hindi dapat maging interesado sa pananalapi nang tuwiran o di-tuwiran sa ano mang kontrata na ipinagkaloob ng pamahalaan, sa loob ng taning ng panahon ng kanyang panunungkulan. Ngunit sa investigative reports ng media tulad ng online news website na Rappler, lumilitaw ang katotohanan na sa maraming lalawigan lalo na kung saan naghahari ang mga dinastiya, talamak ang pagkopo ng mga kontrata sa DPWH ng mga construction company na pag-aari mismo ng nakaupong politiko, o di kaya ay ng kanilang pamilya. Nangyayari ito na para bagang walang umiiral na mga batas; na para bagang wala na silang takot sa pananagutan. Gaya na lamang ng pinangalanang mga proponent o mambabatas na nakikipagsabwatan para pagnakawan ng pera ang bayan—ni isa sa kanila ay walang umaamin. Nagpapagal sa trabaho ang mga pangkaraniwang Pilipino, habang nag-aawak-awak ang kwarta na ninanakaw ng mga mandarambong na siya rin nilang ginagamit para ipagtanggol ang kanilang sarili upang makalusot sa mga kaso at patuloy na makaupo sa puwesto ng kapangyarihan. Halos isandaang araw na magmula ng sabihin ni Pangulong Marcos sa kanyang SONA na pananagutin ang mga nagsasabwatan sa kickback pero hanggang ngayon, ni isa sa mga kawatan ay wala man lang nababasahan ng sakdal. Parang kulang pa ang muhi na ipinapakita ng mga mamamayan. Pahinog na ang panahon. At ang sukdulang poot ng bayan ay maaari nang sumabog. Think about it.

Sa isang panayam, sinabi ni Sen. Sherwin Gatchalian na kung siya ang tatanungin, bubuwagin at magtatayo na lang siya ng bagong Department of Public Works and Highways dahil paano mo lilinisin ang ahensya kung buong Pilipinas ay may korap na DPWH officials. Pero paano ba ang sistema ng korapsyon sa DPWH? Sino-sino ba ang lumalabas na mastermind o proponent, at nakakakuha ng mas malaking parte sa kickback?Lumitaw na sa napanood nating mga privilege speech, at ibinulgar na rin ng mga dating opisyal at kawani ng DPWH na ang kanilang nagiging patron sa kickback ay ang mga mambabatas na naglalaan ng mga pondo sa iba't ibang proyekto ng DPWH na siya namang pinanggagalingan ng kinukulimbat nilang pera ng bayan. Kung gayon, hindi ba't buong Kongreso ay dapat na ring buwagin?Kung totoo ang sinasabi ng Senate President, House Speaker, Ombudsman, at ng Pangulo, na susugpuin nila ang korapsyon, mag sanib pwersa sila sa pagpupurga sa Kongreso ng Pilipinas. Isapubliko ang Statement of Assets, Liabilities, and Net Worth ng lahat ng senador at kongresista. At kung malinaw na hindi tugma ang kinikita sa marangyang buhay ng isang mambabatas, sampahan agad ng kaso sa ilalim ng Republic Act 1379–The Law of Forfeiture of Ill-Gotten Wealth.Pero sa totoo lang, sa napakalaking iskandalong ito ng korapsyon na talagang nagpapagalit sa bayan, kailangan na ring purgahin ang marami pang ahensya sa gobyerno. Malawakang pagpupurga ang tanging makapagtatama sa takbo ng pamahalaan ngayon dahil nawala na ang tiwala ng bayan. Korapsyon ang nagpabagsak noon sa panahon ni Marcos Sr. Sa mas matinding problema ng korapsyon na kinakaharap ngayon ni Pangulong Marcos Jr., mauulit nga ba ang kasaysayan? Think about it. #TedFailonAndDJChacha

'Public office is a public trust. Today, the trust is broken.'Ito ang paninindigan ng Ateneo School of Government sa harap ng pinakamalaking iskandalo tungkol sa korapsyon na ngayon ay kinakaharap ng bayan kaugnay ng mga proyekto ng Department of Public Works and Highways.Nangyayari ang walang habas, walang takot, walang konsensya, at lantarang pagnanakaw na aabot sa trilyong pisong pera ng bayan sa harap ng maraming institusyon na sana nga'y mag-iingat at mangangalaga sa paggamit sa perang pinaghihirapan ng mga mamamayan. Mga institusyon na sana nga ay siyang magpapanagot at magpaparusa sa mga nagkakamali at nangungulimbat sa pera ng bayan.Winaldas ang tiwala ng mga Pilipino. At ang bayan ay binibigo na ng mga institusyon na sana ay tagapangalaga sa kanilang kapakanan.Sa mga nangyayari ngayon, panahon na upang ipakita ang angking kapangyarihan ng sambayanan. Magprotesta, mag-ingay, makiisa, makibaka, sumama sa laban na ito. Ito ang laban ng bayan- People of the Philippines versus the corrupt. Think about it. #TedFailonAndDJChacha

Mahigit 10 ghost at questionable projects na ang nadiskubre sa distrito ni dating Bulacan 1st DEO District Engineer Henry Alcantara na isa sa mga tinaguriang "BGC BOYS" o Bulacan Group of Contractors na ibinunyag ni Senator Ping Lacson na nagpapatalo umano ng milyon-milyon at nagpapapalit umano ng bilyon-bilyong piso sa mga casino. Pero kahit klaro na ang mga ebidensiya ay hindi pa rin sila pwedeng damputin at ikulong dahil kailangan nilang dumaan sa due process.Ang mag-asawang Curlee at Sarah Discaya naman ay umamin na ang kanilang siyam na construction companies ang naglalaban-laban sa mga bidding ng government projects kung saan ay nagbibigay sila ng hanggang 30 porsyento bilang komisyon sa proyekto para sa mga taga DPWH at ilang opisyal ng gobyerno. Pero kailangan pa nating maghintay na pormal silang makasuhan para magsimula na ang due process.Oo nga at nakapagbuo ng Independent Commission on Infrastructure ang Pangulong Marcos Jr., subalit ang lahat ng kanilang impormasyon, dokumento, testimonya, ebidensya at rekomendasyon ay babagsak pa rin sa Ombudsman kung saan maaaring abutin ng ilang linggo, ilang buwan, ilang taon bago sila magdesisyon. At sakali mang makarating sa Sandiganbayan ang kaso, ay posibleng abutan din ng ilang mga taon o dekada ang paglalabas ng hatol. Umiiral ang due process para sa mga tulisan, mga magnanakaw, mga mangungulimbat, mga mandarambong sa perang pinaghihirapan ng bayan, habang ikaw na pangkaraniwang manggagawang Pilipino ay tuloy-tuloy lang sa pagtatrabaho at pag-aambag sa buwis na napupunta sa gobyerno na siya namang kinakamal ng mga diablo. Think about it.

Bilang pagtupad ni Pangulong Bongbong Marcos Jr. sa kanyang binitawang pangako sa SONA noong July 28 na susuriin at ilalabas ang listahan ng lahat ng flood control projects sa panahon ng kanyang panunungkulan, inilunsad ang 'Sumbong sa Pangulo' website noong August 11. Nagbigay rin ng ulat ang Pangulo ng mga paunang resulta ng ginawa nilang pag-aaral tungkol sa flood control projects ng DPWH. Ilan sa mga impormasyong ibinahagi ng Pangulo ay ang kabuuang halaga ng flood control projects sa buong bansa mula 2022 hanggang 2025 na aabot sa P545.64 bilyon, kung saan dalawampung porsyento rito ay pinaghatian lamang ng labing-limang contractor.  Nabanggit din ng Pangulo ang mga impormasyon na nakapagbibigay ng duda kagaya ng pare-parehong halaga ng kontrata pero iba-iba ang lugar, maging ang mga probinsya na may napakaraming flood control projects subalit wala naman sa listahan ng mga lalawigan na may malaking suliranin sa pagbabaha. Higit sa 'Sumbong sa Pangulo' website, ang inaabangan ng mga mamamayan ay kung may mapapanagot at maipapakulong na mga kontratista at taong gobyerno na nagsasabwatan sa pagnanakaw ng pera ng bayan. Totoo kayang may mapaparusahan o magpapatuloy lang sa masigabong palakpakan ang mga walang hiya na sangkot sa katiwalian? Think about it.

Ayon kay Sen. Panfilo Lacson, sa loob ng 15 taon, ang DPWH ay gumasta na ng humigit kumulang dalawang trilyong piso para sa flood management program, na katumbas ng P350 milyon na araw-araw na paggasta para ayusin ang problema sa pagbabaha. Pero bakit nga ba patuloy tayong binabaha kung palaki naman nang palaki ang perang inilalaan ng gobyerno para ayusin ang problema sa baha?Sa pinakahuling SONA ng Pangulong Bongbong Marcos Jr., kinastigo niya ang nagsasabwatang mga opisyal ng gobyerno pati mga kontratista na ginagawang raket ang flood control projects para makakuha ng kickback at SOP.Sambit ng Pangulong Marcos: "Mahiya naman kayo!" Nangako rin siya na isasapubliko ang listahan ng palpak na flood control projects pati mga ghost project, at makakasuhan ang lahat ng mga may sala.Matupad kaya ang panibagong pangako ng Pangulo? Tumalab kaya ang mga patama niya? Mahiya naman kaya ang mga walang hiya? Think about it.

Ang PrimeWater Infrastracture Corporation na sinasabing pagmamay-ari ng pamilya Villar ay kasalukuyang umabot na sa pitumpu't pito ang kontrata sa iba't-ibang local water districts sa buong bansa.Bago pa man ipinag-utos ng Pangulong Marcos Jr. ang malalimang imbestigasyon sa kanilang operasyon dahil sa katakot-takot na reklamo mula sa mga mamamayang apektado ng pangit nilang serbisyo, naglabas na ng audit report ang Commission on Audit (COA) kung saan nakasaad ang ilang obligasyon na hindi nasunod ng PrimeWater sa mga lugar na kanilang sineserbisyuhan.Ilan lamang diyan ay ang hindi pagbibigay ng tuloy-tuloy na supply ng tubig, walang septage managemement plan, mataas na nasasayang na tubig o non-revenue water, mataas na pondong ginasta, at hindi pagpasa sa drinking water standards ng tubig sa kanilang mga gripo.Nakaabang na ang bayan sa pagsasapubliko ng resulta ng imbestigasyon ng Local Water Utilities Administration (LWUA) at sa magiging imbestigasyon ng Kamara de Representante, habang nakakabingi ang katahimikan ng Senado. Sa bandang huli, may mapapanagot nga ba sa pagdurusa ng mga mamamayan? O sa bandang huli ay wala na namang mangyayari at taong bayan pa rin ang magdurusa? Think about it. #TedFailonandDJChaCha

Nakababahala ang inihayag ng isang opisyal ng United Nations Children's Fund (UNICEF) na may totoo at malawakang krisis sa edukasyon ang Pilipinas. Kahit ang Pangulong Bongbong Marcos ay umamin na napabayaan talaga ang edukasyon sa bansa na nagresulta sa kakulangan sa mga silid-aralan, kakulangan sa mga guro, libro, at mababang marka ng mga Pilipinong mag-aaral sa Program for International Student Assessment (PISA). Taon-taon ay palaki nang palaki ang bilyon-bilyong pisong budget na inilalaan para sa Department of Education (DepEd), pero taon-taon ay pare-parehong mga problema ang kinakaharap ng sektor ng edukasyon. Ang mabagal na pagpaplano, pabago-bagong disenyo ng mga silid-aralan, mga palpak na bidding, at kanselasyon ng mga kontrata, ay ilan lamang sa mga suliranin na tinukoy ng Second Congressional Commission on Education (EDCOM II) na sagabal sa pagpapatupad ng mga proyekto.  Hindi matutuldukan ang krisis sa edukasyon na hinaharap ngayon ng mga Pilipino kung hindi matitigil ang krisis sa korapsyon sa gobyerno na hadlang sa maayos na paggamit at pangangasiwa sa pondo. We have a learning crisis because we have a crisis in government leadership. Think about it.#TedFailonandDJChaCha #DitoTayoSaTotoo #SaTrue #TrueFM