阿愷之聲Podcast
阿愷之聲Podcast
王麒愷
EP229 台長時間:鹿港到南港金鐘一日遊
45 minutes Posted Oct 21, 2026 at 11:47 am.
0:00
45:52
Download MP3
Show notes

連續兩年阿愷之聲Podcast入圍廣播金鐘獎Podcast藝術文化獎,對我來講,入圍是一个會使好好思考家己和感謝別人的機會。這集節目欲來分享頂禮拜六(10/17)台長佇廣播金鐘獎的觀察,和這回無得獎對我的意義。

我有信心未來會使繼續做出閣較好的節目,感謝一路以來支持愛護阿愷之聲的各位!

► 廣告贊助|春山出版新冊《囚人:跨越三十八度線的作家》by 黃皙暎
https://www.books.com.tw/products/0011065285

阿愷之聲工商服務時間,現子時春山出版推出好冊《囚人:跨越三十八度線的作家》,這本冊是韓國國寶級作家黃皙暎的人生故事。2024年黃皙暎因為《鐵道家族》這本小說入圍國際布克獎決賽,伊的文學作品早就是韓國人的共同記持。黃皙暎佇1980年代尾期迒過38度線來到北韓,甚至和金日成見面,伊希望透過文化交流予南北韓互相瞭解,但是轉來南韓了後續予警察掠去關,一關就5年。這本《囚人》就對遮開始寫,自囡仔時的記持寫到戰後韓國的民主化運動。若講黃皙暎的一生是韓國現代史的縮影,按呢這本《囚人》會使看著一个文學家按怎透過創作來回應時代。

► 節目音樂| 鹿港新聲閣
► 贊助節目| https://voiceofakai.oen.tw

► 無機會念的得獎感言|

我講的鹿港腔臺語,真濟人聽袂慣習,但阮鹿港人攏感覺恁逐家講話才有腔。

若有人問我講「為啥物欲作台語的Podcast?」,我就咧想,我若是作華語節目,可能就無這个問題。我的答案是,台語予我知影我家己是誰,而且有法度徛佇彰化看世界。

2026年做一个台灣人是幸福的,咱生活佇自由的社會,會使透Podcast予全世界聽著咱的聲;但是面對這个快速、而且政治局勢複雜的時代,做一个臺灣人足辛苦,因為咱要有意識、要真努力,才有法度佇生活中維持本土語言,特別是一直咧消逝的鹿港腔臺語。

我要感謝金鐘獎評審的肯定,這个獎我想欲獻予彰化,我以前攏希望總有一工會使離開這个無聊的所在,後來發覺遮有講袂完的故事。

最後我要感謝阮厝內的人,阮爸、阮媽、阮小弟攏有來到現場。當然閣有阿愷之聲製作團隊,和臺灣大學地理系黃倬英佮洪伯邑老師做我的靠山。

我是阿愷之聲的王麒愷,我講鹿港腔臺語,我驕傲!感謝各位!



Powered by Firstory Hosting