阿愷之聲出外景,來到距離阮兜駛車只要五分鐘的彰化縣福興國民中學,這是節目開台以來第一遍和國中學生和老師作伙錄節目!小等咧,這集叫做「福興之聲」,所以福興到底佇佗?
福興鄉是鹿港鎮的厝邊,但因為鹿港的文化實在傷過強勢,真濟福興人出外攏會講家己是鹿港人。按呢講雖然較方便,但背後其實是對家鄉無啥熟似,因為生份,自然就無啥認同感。其實台長的戶口也佇福興鄉,我13.14歲就去彰化市讀冊,彼个年紀的目標就是努力考試來離開彰化,去上好的學校,但我也咧想,彼當陣若有老師、課程帶我認捌家鄉的故事,無的確,我的人生風景就會無仝?
有這擺錄音機會是受阿愷之聲聽友尤慶堂老師牽線,慶堂老師是學校的地理老師,也是臺語老師,我真佩服佇教育前線教鹿港腔臺語的老師。這回欲來分享福興國中按怎推動108課綱,老師規劃予學生走出學校、認捌地方的「福地興農」課程,有幾落位同學來節目講家己的故事,甚至連校長林妙娟也來空中分享,相當非常趣味。
咱按怎講出家己的故事?緊來聽這集福興之聲!
► 節目來賓|尤慶堂老師、蔡媛聿同學、洪錫琪同學、陳郁璇同學、余悅瑄同學、林威廷同學、蔡鈞名、林妙娟校長(按照出聲順序)
► 節目音樂|鹿港新聲閣
► 贊助節目|https://voiceofakai.oen.tw
► 廣告贊助|春山出版新冊《重構臺灣流行歌曲史》by 陳培豐https://www.books.com.tw/products/0011062381
阿愷之聲工商服務時間,現子時春山出版推出好冊《重構臺灣流行歌曲史:常民/移民的競合交響與「臺灣味」的誕生》。這本冊是中央研究院臺灣史研究所陳培豐老師寫作,陳老師長期研究臺語歌的歷史,我實在真好奇,到底臺語歌的「氣口」是啥?這擺的故事準備對戰後1960年尾期講起,佇彼个外國流行歌和國語歌強勢的時代,臺語歌漸漸予人感覺粗俗,但是,一般大眾猶閣咧接觸的布袋戲、歌仔戲、電子琴、那卡西甚至是Rock n Roll,按怎予臺語歌新的養分?甚至創造出氣口十足的臺灣味,將臺語歌結合草地氣和西洋摩登,創作出厝邊頭尾攏咧聽的歌謠?若講歌曲代表一个時代、一群人的生活,按呢60年代逐工聽臺語歌的人,亻因當咧經驗啥物款的世界?緊來看陳培豐老師講一段臺灣歌的故事!
Powered by Firstory Hosting



