Das ischs gsi vo üs! Danke allne fürs zuelose! <3

Wo müsstisch du uf de Weltcharte anezieh oder id Ferie gah, zum dis Glück finde? D'Jupiterlinie isch eine vo vielne Astrologie-Trends, wo grad ide digitale Welt umeschwirred.D'Wüsseschaft het bis jetzt no kei Nachwiis gfunde, dass Planete eusi Persönlichkeit oder euses Schicksal direkt beihflussed. Und es git au kei physikalischi Würkig vo Planete uf de Mensch.Warum glaubed trotzdem so viel Mensche a ihres Horoskop, gönd zude Wahrsagerin oder lönd sich Tarot-Charte legge? Wieso chan das vielne Mensche uf psychologischer Ebeni hälfe? Und giz en Grund defür, dasses grad jetzt sonen Astro-Hype git? Mir kläred all die und meh Frage ide neuschte Folg «Planlos»!

Deepfake-Pornos, Fake-Profil ond e gstohleni Identität: De Fall Collien Fernandes zeigt, wie digitali Gwalt cha usgseh. s'Problem esch aber ned d'Technologie dehinter, sondern was mer as Gsellschaft drus mache ond wie mer mit Fäll we de vode Collien Fernandes umgönd. I dere Folg rede mer drum einisch meh über: Machtmissbruch, sexualisierti Gwalt, d'Mediebrichterstattig ond wie Männer sich feministischer chönd verhalte. Falls du oder öber wo du kennsch, devo betroffe sind, findsch do Hilf:⁠Opferhilfe Schweiz⁠⁠Online Opferberatung⁠⁠Frauenberatung⁠⁠Frauenhäuser⁠ Für Täter oder betroffeni Männer:⁠Ohne Gewalt⁠⁠Dachverband Schweizer Männer- und Väterorganisationen⁠⁠Mannebüro

Sit Wuche gseht me immer wieder News rund umd Epstein-Files. Me cha läse, wär i de Files vorchunt und was passiert isch uf de Ahwäse vom Jeffrey Epstein. Mir erkläre ir neuschte Folg «Planlos», werum aber bis iz niemer ussert eire Frou im Gfängnis sitzt und verzeue d Gschichte vo de Opfer. Drzue gäbe mr Tipps für töiferi Recherche übere Fall Jeffrey Epstein.

Mir redet zwar immer über neutrale Journalismus bim SRF – aber wie du i dere Folg merksch, simmer bide Abstimmig über d’Halbierigsinitiative alles andere als neutral. Das chömmer nöd sii! Eus liit viel a dere Vorlag und drum wämer ufkläre, um was es genau gaht und was es für Gfahre git, wenn d «200 Franken sind genug!»-Initiative agnoh wird.

Ide neust Folg wirds trashy. Mer rede drüber werom Trash-TV so boomt, obwohl sich die meiste es bizli defür schäme Reality-TV z'luege. Du erfahrsch aber ned nor, was die (psychische) Beweggründ für d Faszination Trash-TV sind, sondern au es bizli behind the scene Wüsse über TV-Produktione. E Prise Feminismus het das Ganze natüürlich au, drum wird idere Folg au no über en Artikel über luuti Fraue im Trash-TV diskutiert.

Ir neuschte Folg geiz umd Familie Beckham und zwar ums Familiedrama rund ume Brooklyn Beckham und sini Frou d Nicola Peltz. Üs isch nämlech ufgfaue, dass i Familiedramene oft d Froue als Schuldigi ahgluegt wärde. Drzue giz wie immer üsi Good and Bad News und spannendi Empfählige.

D'Silvesternacht in Crans-Montana het schlimmi Folge mit sich bracht und steckt de ganze Nation ide Chnoche. Die medial Brichterstattig isch entsprechend gross gsi. Für eus vo «Planlos» wirft sie viel Frage uf. Ih dere Folg redemer über d'Krisebrichterstattig und wie d'Medie mit Fäll wie Crans-Montana umgönd. Mir ordnet ih, warum s'Informationsbedürfnis so gross isch, wo d'Brichterstattig in Voyeurismus kippt und wieso au etablierti Medie untereme massive Druck stönd.Wie verschiedni Länder mit dem Ereignis umgönd und welli Uswürkige die Bricht uf Betroffeni und ufs Publikum chan ha, ghörsch au i dere Usgab.Es isch e wichtigi Folg – über Verantwortig im Journalismus, über Klicklogike und über d'Frag, was mir als Konsument:inne und Journalist:inne aktiv chönd mache, zum nötigi Grenze setze.

Vom neue Bundesrat übere ESC zur Womans Euro, das Jahr isch viu passiert. Mir luege zrüg u rede über d Gschehniss uf dr Wäut und üsi Highlights.

Ide Schwiz sind das Johr scho 27 Fraue oder Meitli (Stand 14.12.25) tötet worde. I dere Folg rede mir drum au über hüslechi und sexualisierti Gwalt ond weli (Fehl-)Entscheid d’Politik troffe het. Falls du oder öber wo du kennsch, devo betroffe sind, findsch do Hilf:Opferhilfe Schweiz Online OpferberatungFrauenberatungFrauenhäuser Für Täter oder betroffeni Männer:Ohne GewaltDachverband Schweizer Männer- und VäterorganisationenMannebüro