Show notes
NITIN MANNA 2019 April 25 Zarhte Ni Pathian Ṭihzahnak "Curuangah, maw Israel mi pawl, Bawipa nan Pathian ih a lo fialmi hi ṭha tein ngai uh. Bawipa cu ṭihzah uhla a thupekmi hmuahhmuah cu tuah uh. Na thinlung zate in Amah cu duhdaw uhla Amai' hna cu ṭuan uh. A Daan cu kim tein thlun uh; nanmai' ṭhatnak ah tuihsun ah ka lo pek a si. – Daan. 10:12-13 Tuih san kan nunphung ah mi pakhat kha Pathian ṭihzah aw tiih ruahnak va pek cu hnihsuahsai le zaangfakza ih ruah tla a si thei men. San man lo ruahnak ih ret sak tla a si men thei. Bible sirhsan hmanah, Thukam Hlun sanlai ruah daan a si, Thukam Thar ah cuvek a ṭul nawn lo, zaangfahnak caan a si, "famkim duhdawtnak sungah ṭihphannak a um lo," (1 Johan 4:18) tiih ruah sak a si thei. Pathian ih in duhsakmi, Amah ṭihzah ding, in timi cu in duhdawt ruangah a si ti kan thei. Hih thupek cu sanman lo (outdated) tiih ruah sak ding a si lo ih Thukam Hlun san ih milai pawl hrang lawng ih ret ding khal a si fawn lo. Peter in, "Hih leitlun nan nun sung ahhin Amah ṭihzahnak thawn Amai' hrangah nung uh," a ti (1 Peter 1:17). Curuangah Pathian ṭihzah nun timi cu ziangtican a si pei? Pathian ṭihzah timi cu hih leitlun ah Amah lawng ruahsan, Amah lawng nun diriamtertu umsun le kan ṭulsammi ziangkim in pe theitu a si tiih ruahsan hi a si. A man pek ih leimi ka si ti thei in Amah duhdawt le A zaangfahnak sungah um ringring (Rom 11:12) hi a si. Jesuh cu kan hrangah a man a khung deuhdeuh asile hih khawvel hi kan ṭih lo deuhdeuh dingih Pathian kan ṭihzah deuhdeuh ding. Pathian ṭihzahnak in kan kiangkap Satan ih siatsuahmi pawl parah Pathian mawhsiat lo dingin in kham. Kan lei a kilkhawi, kan kutke in kilkhawi sak, ih mah le mah mi dingfel ih ruah awknak ihsin in kham. "Pathian ṭihzah cu fimnak ih hramthoknak a si," (Thufim 9:10). - Nancy Guthrie Duhdawtnak famkim neitu Bawipa, Nangmah ṭihzahnak ka neih deuhdeuh tikah thil dang ka ṭih lo deuhdeuh.
