Daniel Cabu ka zirzoi rerolai ah kiosa (lion) khur sungih an thlak tikih olzet in a luat theimi in ka thinlung in thamzet. Babylon acozah hnaṭuantu pawl lakah Daniel ih dinhmun nahsuah le iksiktu pawl in thang an kam ih cumi cu Daniel in siangpahrang biak loin Pathian hnenah nikhat veithum thla a cam ringring ti'n an zuarthlai (Daniel 6:1-9). Daniel in a iksiktu pawl ih phiarsawmnak a theithiam. An tinmi ni a thlen hlanah a thlacam daan a ṭhin ko ding, ti'n an ruat. Asinain Daniel cu iksiktu le phiarsawmtu pawl ih ruah daan vek milai a rak si lo.   "Siangpahrang in a hmin a khen zo, ti kha Daniel in a theih tikah a inn ah a tlung. A inn tlunta khaan ahcun Jerusalem khualam hoi in sangkate a um. Cutawk ahcun a tuah ringring ṭheu vekin a ong awmi sangkate pakhat kiang ahcun a khuk a bil ih nikhat ah veithum Pathian hnenah thla a cam. Daniel cu ṭih le khur, thinphang in a um lo, Pathian hnenah ahleice ih dilngennak le neepnak khal a nei cuang lo. Cu ai ah, nitinte amai' nun daan kel, a tuah ringringmi kha thlengh loin a tuah peh ringring (Daniel 6:10). Daniel cu Siangpahrang in thah dingih a hringhronak in zianghman a thin a harter thei lo.   Himi thu sung ihsin ka hrangah fim ka zir ngahmi cu, Daniel ih cahnak huham cu Pathian zumfek le rinsan in catbaang loin thla a cam ringringnak hi a si. A cahnak cu Pathian hnen ihsin a ra, ziangahtile Daniel in nitin in Pathian lung a awiter ringring ruangah! A nunnak ih buainak a thlen tikah a hrangah a tikcu caan hman daan thlengh danglam a ttul hleice lo. Daniel ih nun daan cu thlengh dualdo nun le phahphah nun si loin thlacam ringring nun a si.                                                                                                   David McCasland   A hmaika ah thlacam ih kan kun ringring ahcun Pathian in a hrangah din theinak thazaang in pe ding.