الحياة عم تركض ونحنا كمان عم نركض  عم نركض من دون ما ننتبه إنّو الوقت اللي عم يمضي منّا مستحيل يرجع  عم نركض…  من دون ما ننتبه إنّو في لحظات بطّلنا عن نعيشها متل ما بتستحق  وفي ناس بطّلنا عم منشوفُن متل ما بيستحقّوا

إنتي حُرّة… وإنتَ حرّ… وأنا كمان حرّ… وما بتبلّش الحريّة إلّا لمّا نكون أحرار من الأفكار اللي بتربطنا بفكر ما منشبهو أو دين ما منشبهو، أو حُبّ ما منشبهو!

نحنا ما خلقنا تا نشبه بعض… ما خلقنا تا نفكّر متل بعض… ونحكي متل بعض، ونلبس متل بعض، ونحلم متل بعض…

كم مرّة لقينا حالنا ضايعين، مش فاهمين على حالنا شو عم بيصير بحالنا… وكم مرّة ركضنا بسرعة عالمراية نسأل شو اللي صاير بحالنا. ولمّا نعمّق النظر بحالنا، منفهم إنّو في شي فينا عم يتغيّر، عم يتبدّل، ومش قادرين إلّا إنّا نخضع لهالمرحلة الجديدة اللي رح نعيشها.

”من قلبي“، رح إحكي معكن مواضيع بطريقة غير، وبأسلوب غير، وبمنطق غير… معكن ”شربل رحمة“ ببودكاست ”من قلبي“