Haizeder eskolan Ea, Elantxobe eta Ibarrangeluko 66 ume daukiez. Eskola txiki nahiko barria da, orain arte Haur Hezkuntza baino ez dabe euki eta orain Lehen Hezkuntza sartzen hasita dagoz, gaur egun hirugarren mailaraino. Urterik urte maila bat irabazten doazela esan deusku eskolako zuzendariak, Alaitz Ajuriak. "Holako eskolek herri txikietako umeen arteko laguntasuna eta harremanak sustatzen dabez" esan deusku Ajuriak. Haizeder Busturialdeko eskola txikien adibide bat baino ez da. Busturian Uzelai eskolea, Gautegiz-Arteagan Montorre, Mundakako eskolea eta Muxikako Urretxindorra be dagoz eta bosten artean 400 familia inguru batzen dabez. Busturialdeko 5 eskola txikien jaia Ibarrangeluko frontoian ospatzen dabilz gaur. Natxituko Haizeder eskoleak hartu dau aurten jai hau ospatzeko ardurea eta Alaitz Ajuria, Haizeder eskolako zuzendaria izan dogu gaur Goizeko Izarretan. Haizederren 13 hezitzailek egiten dabe lan bertan. "Aurtongo matrikulazinoan 12 umek emon dabe izena eta hori eskola txiki batentzat asko da" azpimarratu dau Ajuriak.

Europaren nazinoarteko eguna da gaur eta hilabete barru Europako Hauteskundeak ospatuko dira. Botoen bitartez Eurolegebiltzarra aukeratuko da eta ikusiko da Bruselako ganbara handi horretan dagozan indarren hurrenkera zelan geratuko dan. Aukeretariko batzuk, honeek: Europako alderdi popularra, Europako alderdi sozialistea, Renew Europe taldea (azken honetan EAJa kokatzen da) eta EH Bilduk, BNGak eta ERCk egindako hautagaitza bateratua. Maiatzaren 27an ekingo deutse Europako hauteskundeetarako kanpaineari. Eskuma muturrari aurre egiteko botoa emotera joan behar dala, mezu hori zabalduko dabela uste dau Asier Blasek, EHUn Zientzia Politikoetako saileko zuzendariak. Asier Blas eduki dogu gaur Goizeko Izarretan irratsaioan.   Orain egun batzuk Europar Batzordeko presidentea Ursula von der Leyen muturreko eskumeagaz negozietako prest agertu da. Honetaz be balorazinoa egin deusku Asier Blasek. Gazan eta Ukrainan gertatzen dabilenari buruz be luze eta zabal berba egin dogu beragaz.

Berangon okupatutako Otxandategi dorretxea eta horren lursailak hustu ebazan atzo Ertzaintzak. Bertan batuta egozan ekintzaileak kanporatu ebezan; horreetatik bat atxilotu be egin eben –gerora aske lagata– eta beste bi zauritu; protestan egozanen arabera, Urdulizko ospitalera joan behar izan eben biek. "Milioika euro balio daben proiektu urbanistiko" bat geldiarazoteko eta Otxantegi Herri Lurra izeneko egitasmo agroekologikoa martxan jarteko okupau eben orain dala bi urte ingurua. Goizeko Izarretan irratsaioan ekintzaileetariko bat, Ilargi Onandia, euki dogu gaur. "Okupazinoa obra urbanistiko bat geldiarazoteko egin dogu, oraindik ez da hasi baina dana prestatuta daukie. 500 etxebizitza egin gura dabez eta salatu gura doguz Uribe Kostan egiten dabilzan urigintza  proiektuak" azaldu deusku Onandiak. Atzoko operazinora Ertzaintzak 15 furgoneta bialdu ebazan eta hasiera baten desobedientzia zibiliaren bitartez eta era baketsuan egoereari eutsi eutsela esan deusku Ilargi Onandiak. "Danok jaso genduzan kolpeak baina lurrean egozan pertsona batzuk modu berezian. Bi ospitalera eroan ebezan" azaldu dau Onandiak. Onandiaren arabera Berangokoa ez da kasu isolatua. "Hamar urtetan bikoiztu da lehen egoan etxebizitza kopurua, ez da etxebizitza andana hori eraiki behar. Lur jaube handi batzuk negozioa egiten dabilz eta horreek ez dabilz herritarron beharrizanetan pentsetan. Honek nekazal lur gehiagoren desagertzea ekarriko dau" salatu dabe Otxantegi Herri Lurra ekimenekoek.  

BECek bere 20garren urteurrena ospatzeari ekin deutso. 2004an jarri zan martxan Barakaldoko BEC eta handik hona urte mordoa igaro da. Bi hamarkadatan 3.200 ekitalditik gora antolatu dira eta 19 milioi bisitari igaro dira erakustazokatik. 1.806 milioi euroko ekarpen ekonomikoa eragin dau BECek. "Bilbo, Bizkaia eta Euskadiko eraldaketaren parte bat izan da BEC. Espazio barri eta moderno bat behar gendun eta BECen bitartez hori lortu dogu" azaldu dau Xabier Basañezek, BECeko zuzendariak Goizeko Izarretan irratsaioan. Astegoien honetan Expovacaciones azokan, estaduko 200 turismo enpresa baino gehiago batuko dira. Kuba eta Portugal konbidau nagusi izango dira eta nobedade lez Bilbon kotsul-etxea daben herrialdeek, 40 inguruk, euren eskaintzea egiteko espazioa eukiko dabe. Azken horreen artean Venezuela eta Peru nabarmenduko dira. "Bi motako bisitari dator azoka honetara. Alde batetik, udarako ideia bat daukana eta horri buruz zeozer gehiago jakin gura dauena eta bestetik, ez dakiena zer egin eta informazino orokorra batzera doana" aitatu dau BECeko buruak. Oporlekuetan, gero eta gehiago, karabanak, autokarabanak eta furgonetak ikusten doguz. Turismoaren ganeko eskaintzea osotzeko eurei begirako Caravaning azokea be izango da aste honetan BECen. Makina Erramintako fabrikatzaileen alkarteak urte hasieran esan eban sektorea inozko emoitzarik onenak eukiten dabilela, egoera ona produkzinoan eta esportazinoetan igerten dala. "Zalantza barik hori guztia aurtongo BECeko makina erramintaren biurtekoan isladatuko da, gu sektorearen egoeraren termometroa gara" azaldu dau Basañezek. Ekainaren hasieran izango da biurteko garrantzitsua BECen. Bestalde, bihar eta etzi landa eremuko zonaldeak digitalizetako enpresen Aotec azokea egingo da lehenengoz BECen. 130 enpresa baino gehiago batuko dira eta batez be, populazino gitxiko zonaldeetara zuntza edo sareak bideratzen dabezan enpresen topalekua izango da Aotec azokea. Urtea amaitu bitartean Barakaldoko BECen egongo diran musika kontzertuei buruz galdetuta, Basañezek honakoak azpimarratu dauz: Estopa, Maná, Bryan Adams edo Ura Bere Bidean.

Galdakaoko ospitalean Aires izenagaz erakusketea zabaldu dabe, arnas gaixotasun kronikoa daukienen eguneroko bizitza ikusarazoteko. Amaia Aranburu, Galdakao-Usansolo ospitaleko neumologoagaz berba egin dogu gaur Goizeko Izarretan. Asma, biriketako gaixotasun inflamatorio kronikoa da eta betirako da. Hori bai, tratamenduagaz kontrolatu ahal da eta gaixoak bizi kalidade normala izan leike. Kasu arinak Lehen Arretan tratetan dabez, larriak asma unidadean ospitalean. Urtean zazpi mila ume inguruk Osakidetzako larrialdietara jo behar izaten dabe asmak eragindako arnasa hartzeko arazoen ondorioz. Euskadin asma jasaten daben pazienteen kopurua biztanleriaren %7tik %10era pasau da azken urteetan. Batzuk inhalagailua behar izaten dabe, kasu batzutan tapoi urdinekoa baina beste batzutan tapoi gorrikoa behar izaten da. Beste batzuk horregaz nahiko ez eta ariniketan joan behar izaten dabe Larrialdietara. Osakidetzak eta Euskadiko farmaziek inhalaigaluen erabilera egokia bultzatzeko programea sortu dabe. Inhalagailu honeek ondo erabiltea oso garrantzitsua da, medikazinoa biriketara heltzen ez bada ez dauelako eraginik sortzen. Estimazinoa da pazienteen erdiak, hau da, %50ak ez dauela agindutako tratamendua behar dan moduan gauzatzea lortzen.

Jaurlaritza osotzeko EAJren eta PSEren arteko negoziazinoak bide onetik doazela esan dau gaur Goizeko Izarretan EAJko Maitane Ipiñazarrek. Igorreko politikariak atzo hartu eban Gasteizko ganbaran legebiltzarkide izateko aktea. "Guretzat orain erronka nagusia Osakidetza da, herritarren adina aldatuz joan da eta emon beharreko zerbitzuak aldatuz joan dira eta horretan aurrera egin behar dogu" azaldu dau Ipiñazarrek. PSE-EEren eta EAJren arteko ezbardintasunak estaduko Etxebizitzaren Legean edo autogobernua indartzeko esparruan dagoz. "Gobernu eratzeko negoziazinoetan ezbardintasunek be urten behar dabe, uste dot gai horreetan gitxieneko adostasun bat lortuko dala, esperantzea dekot horretan" gaineratu dau politikari bizkaitarrak. Ultraeskuina zelan gelditu? “Mundu mailako biolentziak gora egin du, baita pertsonen kontrako erasoek, eta horrek asko kezkatzen gaitu” adierazo dau EAJko legebiltzarkideak. Ipiñazarren berbetan ultraeskuindarren hazkundea mundu mailako mogimendua da eta espainiar estaduan orain ikusi beharko da Sanchezek zeintzuk erabagi hartu behar dauzen. "EAJk Sekretu Ofizialen Legearen aldaketea behin ta barriro eskatu dau eta Botere Judizialaren Kontseilua barritzea ondo dago baina hori gehiengo soilagaz egitearen aukeraz gogoeta sakona egin behar da" aitatu dau Ipiñazarrek. Gazan gertatzen dabilenari buruz eta Israeleko enpresa batzukaz erakunde batzuk hasitako boikotari buruz galdetu deutsagu, baita Eusko Jaurlaritzak aurrerantzean gai horretan euki beharko leuken jarrereari buruz be.    

42 Urduliz campusak hiru urte bete dauz eta 300 ikasle baino gehiago izan dabez hiru urte honeetan. Etorkizuneko programatzaileak eta lanbide digitaletan pertsona kualifikatuak prestatzen dabez campus honetan, laneko erronka barriei aurre egin ahal izateko. Parisen jaiotako eta 31 herrialdetako 54 campusetan daukien eredua Bizkaian daukagu. Amaya Molis 42 Urdulizeko komunikazino arduraduna eta zortzi hilabete ikasten daroazan Nerea Gastañaga ingeniaritza ikaslea euki doguz gaur Goizeko Izarretan saioan. "Ingenieritza ikasketak eta 42 Urdulizeko formazinoa bateratzen dodaz. Programazinoari buruz asko ikasi dot eta hilabetez hilabete asko ikasten dot" esan deusku Nerea Gastañagak. 42 Urdulizera astean behin enpresa desbardin bat doa eta lan eskaintzen barri emoten dabela azaldu deusku Amaya Molisek.

Bilboko udalak berak iragarri dau erdigunetik trafikoa kentzeko Emisino Gitxiko Eremua ekainaren 15ean sartuko dala indarrean. Horretaz eta bestelako gai batzuen inguruan berbaz jardun dogu Maria del Rio Bilboko udaleko EH Bilduko bozeroaleagaz. "Zonalde bereziak eskatu doguz, eskolen edo nagusien egoitzen inguruan batez be" zehaztu dau zinegotziak. Eremuak (Abando eta Indautxu) mugakide izango dauazen kaleen erabilerea arautzea be eskatu dau EH Bilduk. Behin betiko testua maiatzaren 10ean bozkatuko da. EH Bilduk ez dau zehaztu neurria babestuko dauan ala ez baina Del Riok esan du legea egin, egin behar dala. Beharrizan handia daben eta kalean bizi diran pertsonek aterpe bat eta otordu bat eukiteko udal zerbitzuetatatik igaro behar dira. EH Bildutik salatzen dabe uztaila arteko itxaron zerrendea dagoala. "Itxaron zerrendan egoteko hitzordua eskatu behar da, bitxia da larrialdietarako zerbitzu bat dalako. Horrek gainera ez dau esan nahi arazoa konponduko danik. Beharrezkao da zerbait egitea" aiatatu dau Maria del Riok. Udal gobernuak Bilboko kaleetako mapa fiskala aldatu dau. 40 urteren ostean kaleka ordaintzen diran zergen mapea eguneratu da. "Bazan sasoia 1987tik aldatu barik dagoan araua eguneratzeko. Etxeen balioa kontuan hartzen saiatu dira mapea eguneratzekoan baina ausartagoa izan eitekezan. Babes Ofizialeko Etxeak dabezan auzoek (Miribilla,  Otxarkoaga edo Peñascal) bardin ordainduko dabe, hori arraro egiten jaku" adierazo dau EH Bilduko bozeroaleak. Legebiltzarreko hauteskundeetako emoitzak Bilbora ekarrita, EH Bilduk %52ko hazkundea euki dau. Hamabi mila ta laurehun bozka gehiago lortu dauz. "Gero eta jende gehiagok EH Bildurengan konfiantzea dauka. Lehen indarra izan gara Deustuko Erriberan, San Frantziskon, Atxurin edo Alde Zaharrean" azaldu dau Del Riok.

Zornotzan Mare Amore, emakumeen futbola sustatzeko klub barria sortu dabe. Hainbat lagunen ekimenez, hutsune bati urtenbidea emoteko asmoz sortu dabe Mare Amore. Denporaldi hasieran ekin eutsen proiektuari eta proiektuaren barri emon deusku Irati Lejarraga bultzatzaileetako batek. Adin batetik aurrera, neskek 14 urte betetan dabezanean, ez daukie herrian jarraitzeko aukerarik. Gehienak Arratiara doaz, baina batzuk laga egiten dabe. Zornotzan Sociedad Deportiva Amorebieta futbol taldea daukie, baina klub horretan ez dago emakumeentzako talderik. Denporaldi barriari begira, kadete mailarako jokalariak beharko leukiezala esan deusku Lejarragak. 10-18 urtekoak. Orain arte egindako izen emotean, klub barrian 60 gazte apuntau dira.

Ospitaletako zainketa aringarriak ikusarazteko Viviendo en la frontera izenaz podcastak argitaratuko dabez hilero, Santurtziko San Juan de Dios ospitaleko kideek. Bizitzaren eta heriotzaren arteko muga horretan dagozan pertsonei laguntzen, arlo ezbardinetako profesionalak dabilz zainketa aringarrien unidadean. Euretako bat Maialen Akarregi erizaina da. "Askotan gure lanean bizitzaren eta heriotzaren arteko muga txiki horretan egiten dogu lan. Familiei zaintza honeek badagozala ikusarazo gura deutsegu eta San Juan de Diosen egiten dogun lana hedatu nahi dogu" azaldu deusku Akarregik gaur Goizeko Izarretan. Podcastetako gaiak ezbardinak izango dira, eta podkastak hilero argitaratuko dabez. Zainketa aringarrietan dagozan pertsonei zelan laguntzen deutsen esan deusku Akarregik. Alde fisikoa zaintzen dabe, baina baita emozionala be. 24 ohe daukiez zainketa aringarrien unidadean San Juan de Dios ospitalean. Unidade horretan egiten dan lana ikusarazoteko podkast honeek Ivoox, Amazon, Youtube eta Spotifyn entzun ahalko dira. Hilero bat kaleratuko dabe.