Chidiya ki tatti shubh aur kauwe ki tatti ashubh. Dono hi udne wale jeev, aur dono ke mal-mutr ek samaan. Phir yeh paarthakya kyun? Kya Ghosh babu ko iska jawaab mil payega? Kya unke maata ji ki kahi baat satya hogi? Is baare me Doctor saab ki kya raay hai? Aaiye pata karte hain...

Billi ne kaata rasta, bhavishya ho gaya khasta. Hansi mazaak tak to theek hai, par kya sach me billi ka raasta kaatna, bhavishya pe prashna chinha laga deta hai? Kya Deepak ke saath bhi kuch aisa hi hoga? Uske pariwaar ko janwaron se bair kyun hai? Kya Deepak ka beta is baat ko samajh payega? Aaiye pata karte hain...

Aksar kaha jata hai ki agar peeche se kisi ko toka, to haath se niklega mauka; ya hogi anhoni. To kya Sajju ke saath bhi kuch aisa hi hoga? Kya Riffat bi yeh kabhi samajh payengi? Kaisa hoga Sajju ka bhavishya? Aaiye pata karte hain...

Triskaidekaphobia. Sunne me ek ajeebo gareeb naam, clinically ek maanyata praapt maansik rog, aur asliyat me ek darr ki parakashta. Number 13, ek aisa number jise hum jaane anjaane avoid hi karte hain. To kya Riya ise apni life me avoid kar payegi? Kya Varun apne darr se jeet payega? Kya Shetty koi hal nikal payega ya ghun ki tarah pisega? Aaiye pata karte hain...

Menstruation ke dauran mandir nahi jana hai, ya pooja bhi nahi karni hai. Aisa lagbhag har ghar ki manyaata hai. Par kya yeh niyam swayam bhagwaan ne banaya tha? Kya amaanya karne se bhagwaan gussa ho jaate hain? Kya Sangeetha ke maa ki soch sahi thi? Kya Sangeetha ke Papa ka sapna poora ho payega? Kya Sangeetha apni soch badlegi ya samaaj ki? Aaiye pata karte hain...

Mynaon ko leke kaha jata hai ki one for sorrow, two for joy, three for letter, four for toy. Nursery rhyme tak to theek hai, par kya aisa sach me hota hai? Kya insaan ki maanyata, uske karmo se badi ho sakti hai? Kya Choubey ji ki saalon ki mehnat rang layegi? Kya Mukesh apne zindagi ki jung jeet payega? Kya Pintu bhai ki salaah, Mukesh ke kaam aayegi? Aaiye pata karte hain...

Aksar dekhne ko milta hai ki bachche ke janm lete hi, maa sabse pehle use kajal ka kaala teeka laga deti hai, buri nazar se bachane ke liye. Par agar maa hi uske patan ka kaaran ban jaaye to? Kya Sakina ka pariwaar kabhi ek ho payega? Aakhir Kajlu ka pesha kya hai? Kya Sakina ka kaala teeka use buri nazar se bachayega? Aaiye pata karte hain...

Raat me lagaoge jhadu to Lakshmi ji mooh pher lengi, aisa aksar sunne ko milta hai. Dubey ji bhi bade strict the is baare me. To kya Chotu samay se jhadu laga payega? Kya Dubey ji bure insaan hain? Kya Chotu ka sapna kabhi poora hoga? Aaiye pata karte hain... 

Sheesha ho ya dil, tootta to dono hi hai. Ab toota dil to phir bhi jud jata hai, par toote sheesha ka kya janaab? Kehte hain ki ghar pe sheeshe ke tootne se, 7 saal ke liye buri kismat peecha nahi chhodti. Kya aisa sach me hota hai? Aakhir Pankaj ki kya raay hai is baare me? Kya Seema ka toota dil wapas jud payega? Kya Pankaj ki maata ji koi chamatkar kar payengi? Aaiye pata karte hain...

Daayi aankh phadki to kuch achcha hone wala hai. Baayi phadki, tabhi kuch bura hua. Aisa kuch aksar sunne me aata hai. Par kya aankhon ka phadakna, sach me bhavishya ka darpan hota hai? Kya Batuk maharaj ke kahe anusar, Sonu ki aankh phadki? Aur agar phadki, to kya use mann-vaanchit phal mil paaya? Aakhir kya likha hai Sonu ke bhavishya me? Aaiye pata karte hain...