I de achte und somit (vorerst) letschte Episode simmer no einisch z zweite zämegsesse und hend chli über Erfahrige mit Siitesprüng ih eusem Umfeld gschwätzt und eusi unpopular opinions bezüglich Dating useglah. Und demit d Singles unter eus über de Summer au endlich öper findet, hend mir für eu ganz am Schluss vo dere Folg no es paar spannendi Dating-Tipps vo eusne Friends zämegsammlet. Take care und viellicht bis bald!

I de siebte Episode hemmer zum erste Mal es Pärli debi. D Milena und de Lirit sind zwei ganz tolli Mensche mit unterschiedlicher Herkunft: Sie isch Schwizerin/Italienerin, er chunt us em Kosovo. Sie verzelled eus vo ihrne persönliche Herusforderige, wo sie ih ihrere lange Beziehig hend müesse meistere.

I de sechste Episode sind mir usnahmswiis wieder mal z zweite. Mir lueged zrug uf die ersti Episode und reded drüber, was sich bi eus sither persönlich veränderet het. Usserdem diskutiered mir über Ifersucht, Heartbreaks, s'Schicksal und brünzlendi Schaf.

Die füfti Episode widme mir de Fraue. D’Anne-Sophie isch euse tolli Gast - mit eus diskutiert sie drüber, was es eigentlich bedütet, i de hütige Gsellschaft e Frau z’si. Usserdem teilt sie ihri persönliche Erfahrige zum Thema Feminismus, Menstruation als Tabuthema und self-love.

I de vierte Episode wemmer über es Thema rede, wo eus sehr am Herze liit: Toxic Masculinity. Und was heissts eigentlich, en Mah z’si? Euse Gast - de Edin - verzellt eus vo sine Erfahrige und erklärt, wieso mer als Mah schräg ahgluegt wird, wenn mer meh Wert uf sini Hygiene und sis Üssere leit als anderi. Mit ihm diskutiere mir usserdem über gsellschaftlichi Problem und drüber, weli Rolle mir alli i dere ganze Thematik spieled.

I de dritte Episode redet mir mit eusne zwei Gäst Amina und Stefan über sehr viel verschiednigi Theme - vo schlechte Erfahrige uf Tinder und Dating-Problem mit Balkan-Eltere bis zum virale Hashtag #textmewhenyougethome.

I de zweite Episode dörfed mir eusi erste Gäst begrüesse - d Karin und de Luca. Au sie sind single und hend scho einigi Erfahrige mit Dating chöne mache. Mit ihne diskutiere mir über s erste Date: Was sind absoluti No-Gos und wer söll überhaupt d Rechnig zahle?

I de erste Episode lerneder eus biz besser kenne, bevor mir ide nöchste Folge mit verschiedene Gäst spannendi Themene rund um Dating, Beziehige und meh reded. I dere Folg leggemer d Karte uf de Tisch und verzelled eu, wieso mir zwei no single sind und weli Problem mir bim Date atroffe hend.