كم مره حدا علّق على أطفالك؟ كم مرّة حد حكى ليه بنتك سمرة؟ ليه ابنك نحيف؟ وكم مرّه الي حواليك تدخّلوا بتربيتك لأطفالك؟ شو نعمل وكيف نتصرّف، خاصة لمّا الناس يكونوا قراب علينا وناس بحبونا وبحبّوا أولادنا وبناتنااليوم بأنا وطفلي رح نحكي عن تدخلات الناس وحكي الناس

كم مرة بتلومي حالك إنك ما أطعمتي أولادك أكل صحي؟ متى آخر مره ندمتي ندم كبير إنك صرختي على أطفالك؟ قعدوا كثير ساعات قدام الشاشة وحسيتي إنك أم سيئة؟ أحاسيس ومشاعر مركبة، بتثقل علينا وبنصير شوي شوي نميل من وجعنا وتعبنا.. شعور الذنب، ما في أثقل منه ..وإحنا الأمهات بنعرفه وبزورنا كثير وبضيعنا في هذه الحلقة، رح نفكك هذا الشعور ونحكي عنه

بنصير أهل.. وبتبدأ رحلتنا نحو المجهول منّا ببدأها بوعي ومعرفة.. ومنّا ببدأها غير مدرك لحجم المسؤولية.. بنمشي هاي الرحلة بدون ما نعرف شو هدفنا، ولوين رايحين؟ وإذا عنّا هدف، هل رح نوصله؟ وهل شخصياتنا وأنماطنا بوصفنا أهل، رح تأثّر على مسيرتنا بهاي الرحلة؟ اليوم في حلقة "أنا وطفلي" رح نحكي موضوع ما انطرح من قبل كثير.. وهو الرؤيا بالوالدية.. ومدى تأثير أنماط شخصياتنا عليها.

كم مره حطينا حدود بالبيت وأطفالنا رفضوها؟ شو الخط الفاصل بين الحرية والحدود في البيت؟ متى نعطي طفلنا يقرر؟ متى إحنا الأهل نقرر؟ ومتى بنقدر ناخذ قرار مشترك؟ اليوم في الحلقة الرابعة من بودكاست "أنا وطفلي" موضوعنا ..كيف نحط الحدود لأولادنا وبناتنا بالصورة الصحيحة

اليوم رح نحكي عن أكثر الجمل تدوالا عندنا إحنا الأهل: "إبني عنيد" "بنتي عنيده" بين عناد الأطفال والحفاظ على استقلاليتهم بالرأي، في مساحة.. مساحة ممكن نستغلّها لصالحنا وصالح أطفالنا، وممكن كمان تتعبنا وترهقنا.. كيف نتعامل مع عناد أطفالنا؟ وكيف نستغل الخصلة صح؟ بحلقتنا اليوم بتلاقوا الجواب

بين زمان واليوم، كثير أمور تغيّرت وتبدّلت، ومنها التربية. بس لليوم بنسمع جمل مقارنات بين جيلنا وجيل أهالينا وأسيادنا -جمل بتخلينا نشك بقدرتنا بمهارات التربية وإيماننا بأنفسنا إنه رح ننجح بتربية أولادنا وبناتنا كيف لازم؟ مين ربّى أحسن؟ كيف زمان ربّوا عشرة أطفال؟ ليه اليوم تربية طفلين فيها تحدي أكبر؟ بهاي الحلقة من بودكاست "أنا وطفلي" رح نحكي عن شو تغيّر؟ وشو ما تغيّر؟

قصة "أنا وطفلي"، من لما بدأت بالأفكار الوردية حول الأطفال والإنجاب وحتى الصدمات الحقيقية اللي بتبدأ بأسئلة مثل: أنا عنجد صار عندي بيبي؟ ليه مش قادرة أحس بالمشاعر الحلوة الي كثير أمهات تحدثوا عنها؟ ليش ببكي دائمًا؟ كيف بدي أريّح ابني/بنتي؟ الأسئلة بتستمر وبتكبر كل ما بكبروا: كيف أحل الخلافات بين أولادي؟ كيف أحافظ على هدوئي معهم؟ وشو بدنا نعمل لما يكبروا؟ لنوصل لهون، للمساحة اللي رح نحكي فيها بواقعية وإيجابية ونتجنب أخطاء صارت مع أهلنا بتربيتنا، ونسعى لخلق مجتمع جديد سوي نفسيًا.