時間：5年前嘅一個晚上

地黑：封閉區域啞鈴洲東堤海灘

*海浪聲

盧婷：凱安佢潛咗落水咁耐仲未返上嚟！佢會唔會有事架！

盧葦：婷婷，如果係阿哥佢夜潛，我哋就要擔心啫，但凱安佢係凱氏未來嘅代表，駛乜擔心呢？我哋起個火，燒住野食等佢上嚟啦！

盧綠：你個阿葦！睇少我！？我依家就即刻落水！

盧婷：吓！綠哥哥！你認真架？

盧綠：我好認真架！我拎晒架撐啦！

盧葦：婷婷，阿哥佢拎住長矛，好明顯係去捉魚，唔係潛水啦！

盧綠：我就潛深啲！捉條皇帶魚上嚟！

裘雪：阿綠！唔好啊！我早幾日已經測到今日係凶日…不宜落水…你睇下…啲水流咁急，海入面一定好多暗流…我叫咗阿安唔好落佢架啦！佢死都唔聽…你地睇埋天上嘅星星，呢個排列係凶…

盧葦：阿雪，你唔係話占卜只係參考咋咩？

盧綠：係囉，下下都要占卜先行事，咁如果你占到自己係天刹孤星嘅命格，咁婷婷咪

裘雪：阿綠！你講咩啊？

盧綠：我係話咁亭亭玉立嘅村民就無福囉～

盧葦：好啦，既然阿雪同婷婷你哋咁擔心，咁等我叫佢返上嚟啦！

盧婷：葦哥哥，可以點叫啊？

盧葦：就用呢個！

裘雪：海螺？

盧葦：呢個係凱安送比我嘅生日禮物，佢話只要我吹響佢，就一定會聽到喎！

裘雪：都無根據…水同空氣唔同，傳遞聲音嘅能力相差好遠架！

盧婷：葦哥哥！比我試下吹啊！

裘雪：婷婷，你唔係真係信啊？

盧婷：你教我架嘛～要有實驗嘅精神！

盧葦：婷婷！用盡你嘅全力！響到係深海嘅凱安都聽到！

盧婷：好！

*吹海螺聲效

裘雪：都話咗唔會有用架啦…

盧婷：一次唔得，就試多次再大聲啲嘅！

*吹海螺聲效

*腳步聲由遠至近

盧葦：你哋睇下！係凱安啊！

盧婷：嗰海螺真係有用啊！

凱安：（喘氣聲）喂喂喂…吹咁大聲，係咪要嘈醒我阿爸同所有村民啊？

盧葦：阿安，我哋擔心你嘛！

凱安：下次要吹，用呢個吹！

盧婷：嘩！呢個海螺成個頭咁大啊！一定會超大聲！

凱安：聽日等我過咗凱氏世代相傳嘅潛水測試兼成人禮，就吹響呢個海螺做我凱旋而歸嘅音樂！

裘雪：但阿安你頭先點解搞咁耐嘅？

凱安：仲好講！你整嘅琉璃護目鏡抵受唔住水壓，裂開然後入水啊！

裘雪：對唔住！我今晚幫你趕工修補返佢！

凱安：你要整一個可以抵受幾百米水壓嘅護目鏡，等我可以搵到九頭海蛇封印嘅位置！

裘雪：但以我地裘氏多年嚟嘅推算，嗰封印應該唔會有事

凱安：唔怕一萬，只怕

盧綠：（打斷）只怕大家都肚餓啦！我去打啲海鮮返嚟，預祝聽日凱安順順利利！

裘雪：阿綠，作為村長嘅繼任人，點解你每次都迴避呢啲討論嘅？你一啲都唔擔心咩？

盧綠：我只係擔心大家生活得快唔快樂！其實就算玄武大帝唔回歸，只要保持到依家嘅生活，我都覺得好滿足

凱安：咁九頭海蛇呢？

盧綠：阿安你咁好打，九十九頭海蛇都打唔贏你啦！

凱安：好！我會變得更強！由我去守護大家！

盧葦：咁依家可以去捉魚未呢？我好肚餓啦！

凱安：我去啦～等阿綠去捉，聽晚都未有得食啊！

盧綠：咁我生定火等你啦！

盧婷：阿安！我要食龍蝦！

*海浪聲效

盧綠：（讀白）唔知點解我會諗起呢段5年前嘅回憶…當時大家都真係好無憂無慮…但依家…我被半人半魚狀態嘅凱安吸收咗之後，成為佢十條頸上面其中一個人頭…我可以感受到其他人嘅情緒…包括凱安…咁頭先嘅夢…係屬於我…定凱安呢…？

而雖然我仲可以睜開眼，可以同盧零、盧如、盧天、盧地、盧仁、阿爸、葦仔、婷婷對望…但我哋全部人都受凱安控制…完全郁唔到…無晒自主權…

*海風聲效

盧綠：（讀白）我感受住柔和嘅海風，連同凱安、裘雪、阿達、換成村民服裝嘅今敏及人工智能坐上一艘大船…凱安佢究竟有咩計劃呢…

凱安：玄武童子，你幫我吹響呢個海螺！

達：係…

*吹海螺聲效

裘雪：阿安…你唔會傷害啲村民架呵？

凱安：乜我係你心目中係咁殘暴架咩？阿雪，阿達，只要你哋配合我，啞鈴洲好快就可以回復正常！

達：（讀白）由於我係外人…無權影響啞鈴洲嘅未來…另外，為咗所有村民嘅安全，我只好配合凱安…等佢完成佢嘅計劃之後…我先可以登出…而由人工智能變出嚟嘅大船順風而行…我哋好快就返到啞鈴洲…部分村民聽到海螺嘅響聲，蜂湧而至，喺碼頭等待我哋…而凱安就變返人型…

*船帆郁動聲效

*泊岸聲效

*木版上奔跑聲效由遠到近

裘仁：（由遠到近）阿雪！玄武童子！仲有…阿安…？你無事啦！

裘雪：仁叔…我哋…返嚟啦…

裘仁：咁綠仔呢？仲有呢兩位係…？

凱安：仁叔，佢哋都係玄武大帝嘅使者！

裘仁：兩位使者，請恕裘仁無禮…

凱安：仁叔，即刻幫我召開村民大會！我哋有重要事宣布！

裘仁：係嘅…知道…

時間：180年9月24日

地點：封閉區域Area DB Island北帝廟外空地

村民甲：（細聲）做咩無端端開村民大會嘅…

村民乙：（細聲）唔通玄武大帝會回歸？

村民丙：（細聲）又有玄武童子…又多兩位玄武使者…唔通九頭海蛇就嚟復活！死啦！又會有大凶日啦！

村民丁：（細聲）但點解唔見盧綠村長嘅…？仲有嗰個凱安唔係變咗怪物架咩？

裘仁：（大聲）所有啞鈴洲嘅村民靜一靜！我哋依家等凱安佢交待究竟發生咗咩事！

凱安：咁多位村民，24日前，大凶日降臨，第五任村長盧和大病逝世，令啞鈴洲人心惶惶。而大家估得無錯！因為九頭海蛇嘅封印解除咗！所以先會有大凶日！

*眾村民愕然

凱安：不過大家唔駛擔心！全能嘅玄武大帝派遣咗玄武童子嚟處理事件！佢同第六任村長盧綠出海去解決九頭海蛇！不過九頭海蛇事隔多年魔力大增！所以玄武大帝派遣多兩位使者幫手！

村民甲：我哋憑咩信你呢個怪物啊！

村民乙、丙、丁：係囉！你呢隻怪物！

凱安：哈哈哈，我唔係怪物！而係被玄武大帝所揀中，擁有殲滅九頭海蛇力量嘅天選之人！當時事出突然！我同大家一樣都未識得反應！不過依家已經安全啦！係咪啊，玄武童子？

達：係…凱安句句屬實…

村民乙：咁盧綠村長呢？我哋淨係信佢一個人！

凱安：阿綠佢…不幸戰死…

裘仁：咁佢條屍呢！你點解唔帶佢返嚟！等我哋好好安葬佢啊！

凱安：仁叔，阿綠佢嘅心靈永遠同大家同在，因為！

*伸頸聲效

達：（讀白）凱安佢伸出另外九條頸！露出盧零家族其他九個人頭出嚟！

*眾村民嘩然！

凱安：玄武大帝召喚咗歷代村長出嚟，連同阿綠、阿葦、婷婷，整個盧零家族借力量比我，加上玄武童子及兩位使者，合我哋眾人之力，成功解決咗九頭海蛇呢隻怪物！所以，我真係好感激盧零一家嘅貢獻！

裘仁：咁等我依家即刻叫佢哋媽媽返嚟先！佢每日以淚洗面！估唔到…阿綠佢哋一去不返！仲要白頭人送黑頭人！

凱安：仁叔，而家當務之急係處理啞鈴洲嘅事務。九頭海蛇嘅大患已經解除！阿綠死前吩咐我，希望我成為下一任村長！

裘仁：咁九頭海蛇條屍呢？可唔可以比我哋一見？

凱安：仁叔，你係唔信我？定唔信我哋啊？

裘仁：阿安，仁叔唔係咁嘅意思…只係如果見到嗰個可恨嘅九頭海蛇屍身，我哋會更加安心啫…

*伸出手臂聲效

裘仁：阿安！點解你隻手…會變成五條海蛇架！？

凱安：各位！點解無九頭海蛇嘅屍身？因為我將佢食咗！防止佢殘骸有復原嘅可能！

村民甲：咁你咪即係變咗九頭海蛇？

凱安：我唔係變咗九頭海蛇，而係我用我嘅身體呑噬咗佢！令佢永遠消失！

村民乙：咁會唔會有一日到你失控架？

凱安：點會呢！我係玄武大帝揀選嘅人，佢委托我去管理呢個啞鈴洲！大家可以放心！啞鈴洲一切如常！

村民丙：玄武童子同兩位使者！你哋可唔可以叫玄武大帝出嚟！等我哋可以求個安心！？

村民乙：係囉！我哋全部人都好想見玄武大帝！

凱安：即係依家你哋淨係信玄武大帝，唔信我哋咁多個？

村民甲：唔係！只係我哋見到玄武大帝會更安心啫！

眾村民：係囉！玄武大帝！玄武大帝！玄武大帝！

凱安：大家靜一靜！阿雪！同大家講玄武大帝唔會回歸嘅事實！

裘雪：咁多位村民，玄武大帝佢會喺北帝星遙遠觀察我地…所以…大家可以放心…

村民乙：點解喎！咁多年嚟，我哋都係等玄武大帝回歸！只係見一面！點解唔可以呢？

凱安：咁多位，我係玄武大帝喺啞鈴洲嘅代表！

*行雷聲效

裘雪：（讀白）阿安佢望一望今敏，跟住用手指一指百年古樹，然後一度雷直劈古樹！古樹著火，然後倒下！同之前村長選舉嘅時候，阿綠做嘅動作一模一樣！

凱安：點啊，我想行雷就行雷，落雨就落雨！因為我就係玄武大帝嘅代表！你哋仲有冇野想要我證明？

村民甲：凱安，我唔係唔信你…只係發生咁多事…我哋…

達：（讀白）呢個時候，今敏拍一拍人工智能K Area DB Island 嘅膊頭，然後K Area DB Island 向天投射咗一個玄武大帝畫象出嚟！

*投影聲效

眾村民：係玄武大帝啊！

達：（讀白）然後有一把聲係天空度傳出嚟，響遍整個啞鈴洲。

K Area DB Island：（回音聲）咁多位村民，我就係玄武大帝。我會喺北帝星守護大家。同時，凱安會代我管理啞鈴洲。

*投影結束聲效

凱安：大家聽到啦！仲有冇問題？

村民甲：全能嘅玄武大帝！唔好走住！可唔可以復活盧綠！或者盧和村長！

凱安：玄武大帝都講得好清楚！我係新一任村長！

村民乙：但盧綠一家帶領啞鈴洲係最好嘅！

眾村民：復活村長盧綠！復活村長盧綠！

凱安：啊！都話盧綠一家已經戰死晒囉！

*伸長手聲效

村民甲：（被捻頸，十分痛苦）凱安…你…做…咩…啊…

凱安：我比你近距離睇下盧綠嗰頭！仲有盧零以及歷代村長！佢哋全部死晒！我先係你哋嘅村長啊！

村民甲：（被捻頸，十分痛苦）大…家…睇…下…盧綠佢…流緊…眼…淚…

裘仁：唔止綠仔，仲有葦仔、婷婷！仲有咁多位村長嘅頭都流緊眼淚啊！！！

村民甲：（被捻頸，十分痛苦）玄…武…大…帝…求…你…復…活…盧…綠…村…長…

眾村民：復活盧綠！復活盧綠！

凱安：盧氏！盧氏！你哋知唔知佢地家族一直以嚟都控制住我哋所有人啊！

*魚人形態聲效

村民乙：凱安佢又變返怪物啦！

*伸手聲效、蛇動聲效

凱安：你哋全部人都受玄武大帝、九頭海蛇同盧零家族束縛！等我釋放你哋！令你哋得到真正嘅自由啦！啊！

村民丙：係蛇啊！好多條蛇由凱安隻手走出嚟啊！

*眾人大叫救命

*蛇咬聲效、村民痛叫聲

村民甲：（痛苦）我啲皮…

村民乙：（痛苦）生咗魚嘅鱗片…

村民丙：（痛苦）我哋…慢慢變成…凱安咁啊…

*眾村民痛叫

裘仁：阿安你做咩啊！

裘雪：仁叔！你唔好咁多口！聽阿安講啦！

裘仁：玄武童子！玄武使者，究竟發生咩事啊！

裘雪：仁叔唔好再嘈啦！

*伸手聲效

裘仁：（被捻頸，痛苦）阿安…你…想..點…啊…

凱安：仁叔，我創造緊一個有史以嚟最安穩嘅啞鈴洲！啊！

裘仁：（痛叫）叫！

裘雪：仁叔！

*滴血聲效

裘雪：阿安！你應承過大家唔會傷害村民架！

凱安：阿雪，無人問問題，咁就無問題啦！同埋佢哋無死，只係成為我嘅一部分啫！靈魂同肉體釋放計劃！繼續！

*蛇動聲效

*眾村民大叫

今敏：本身仲諗住幫你洗晒或者重構村民嘅記憶，等你從頭嚟過，估唔到你仲絕。好嘢，好嘢。

達：（讀白）唔駛幾分鐘，北帝廟對出嘅白色空地變得血流成河…裘雪望住被咬之後變成魚人兼被同化嘅村民…

眾村民：海神！海神！海神！

裘仁：阿雪…原來…做…魚人…嘅感覺…係咁…

裘雪：（極傷心）仁叔…我對你唔住…

凱安：由依家開始，大家唔駛頒望玄武大帝，唔駛怕九頭海蛇！可以水陸兩居！呢個就係真正嘅自由同快樂！

達：片刻之間，得返裘雪一個係「人類」…佢跪咗喺地上，袋喺衫入面，刻有「Z」嘅透明水晶球碌咗出嚟…沾滿咗村民嘅血液…

*步行聲效

達：（讀白）K Area DB Island行去裘雪前面，執起嗰個水晶球，抹走上面嘅血液。再認真細睇，原來嗰「Z」係喺水晶球入面，下半部分係放滿咗白色細沙，中間位置有一個閂，欄住「Z」下半部分嘅沙流返去上面…

K Area DB Island：裘雪，仲記唔記得我同你講過，要相信科學嘅力量同使用嘅時機。

裘雪：科學！科學！我呢個最強大腦乜都諗唔到！

K Area DB Island：裘雪，你冷靜啲先。你睇唔睇到水晶球入面嘅細沙被阻塞住？

裘雪：睇到又點啊！

K Area DB Island：水晶球嘅左邊有一粒好細粒凸出嚟嘅掣。上面刻有4粒英文字母。你依家係最強大腦，亦有呢度嘅創世記憶及智識。睇唔睇得明嗰4個英文字母？

裘雪：係C.T.R.L，即係？

K Area DB Island：Control。撳住Control 掣，水晶球內「Z」嘅橫閂就會鬆開，下半部分嘅沙就可以倒流返去上面。

裘雪：所以…我可以…

*撳掣聲效

*沙粒倒流聲效

*奇幻聲效

*裘仁、凱安說話倒轉！

達：（讀白）裘雪撳實control 掣！再倒轉水晶球！「Z」字內下半部份嘅細沙倒流！然後水晶球發光！眼前嘅景象好似時光倒流咁回帶！地面嘅血液倒流返去村民體內！唔止仁叔！其他被咬嘅村民係由魚人變返做人！得我、今敏、K Area DB Island、仲有拎住水晶球嘅裘雪無受影響！

至於凱安亦倒帶返去捻實仁叔條頸嘅嗰一剎那！

裘仁：（痛苦）阿雪…究竟…發生…咩…事…

凱安：阿雪！你！

達：（讀白）裘雪無理凱安！再撳control 掣同倒轉「Z」字水晶球！等更多細沙倒流！

凱安：（被扭曲）阿雪！你…放…低…個…

*魔幻聲效！

Zip噏劇場 Game of Eden 第二季 小島篇 第109回「終局（上）」

阿攝 飾演 阿達

CFun 飾演 盧綠

鄧添樂 飾演 盧葦及盧零

Crystal 飾演 盧婷及盧如

Kity 飾演 黑烏鴉盧天

小白 飾演 白烏鴉盧地

Ant 飾演 今敏

Potter 飾演 凱安

Harry 飾演 裘雪

Alton 飾演 K Area DB Island

小強 飾演 裘仁

天頤、梓豪、Jean 客串 村民

編劇及製作 阿攝
音樂 BEAT FRIDAY (Night, To Stay, Fairness, Playback, Minty, List, Extension, thing)
封面設計 Followmelikeblack

Leave a comment and share your thoughts: https://open.firstory.me/user/ckyhgwclu0xlr08721i22wc7k/comments