各位聽眾朋友大家好，亻厓係客家創作歌手曾仲瑋，來自新竹縣竹東鎮，亻厓係創作海陸腔个客家音樂，開始客語歌曲創作差毋多有12年咧，目前發行三張客語創作專輯，入圍兩擺金曲獎最佳客語歌手獎，這擺想愛摎大家介紹亻厓第三張專輯《Onga onga》裡背个一條歌曲「屙氵巴」。可能有人聽著歌名斯會笑出來，仰會有人用屙氵巴來做歌名？本來屙氵巴个意思斯係講人無責任感，大家會試著佢講个話聽毋得，毋會相信佢。在這位寫个其實係講頭擺个亻厓自家，因為亻厓頭擺在台北做頭路，該時節亻厓係一個電腦工程師，逐日試著自家囥在辦公室裡背，無法度追求自家好唱歌个夢想，一日又過一日，一年又過一年，毋知自家哪時節做得成功，有兜成就轉家鄉，所以寫咧這條歌曲，鼓勵大自家做得勇敢，往自家个夢想，自家想愛做个事情，大步向前行，莫緊企在原來个位所，越想越毋會做，斯像該時節个亻厓共樣。這條歌曲特別感謝編曲先生姜道，乜係專輯个製作人，佢聽忒這條歌曲个demo以後，摎這條歌曲打造無共樣个韓國舞曲風格，還分佢有記憶點，大家聽著歌曲斯會知有一段旋律緊出現，配合歌名屙氵巴，分客家屙氵巴搖身一變，變成韓國歐巴！

這條歌曲在網路上乜有亻厓在鬧熱打擂台節目頂背一邊唱歌一邊跳舞个影片喔，承蒙編舞先生胡予欣摎亻厓扌帣手，第一擺做唱跳歌手，正經試著當緊張呢！希望自家个音樂風格做得越來越多元，越來越多風格，大家有閒做得尋來看喔！這下大家來聽這首歌曲～安著「屙氵巴」。