塗炭仔

某國有兄弟兩人做朝內的文官。兄哥有生一个查某囝名叫寶善。到14歲，父母攏過往，就予in叔chhoā去照顧。小弟也有生兩個查某囝；一个名叫寶珠，一个名叫寶玉。寶珠這時12歲，寶玉13歲。In老父這時身體致病，就辭官回家養病。

In嬸真疼伊兩个查某囝，每日干焦顧梳妝。寶善每日料理煮食洗衣裳，也著揀塗炭，致到身軀常常有塗炭的 lâ-sâm，紲共伊叫做塗炭仔。總是遐爾著磨亦毋捌受氣，算是真好女德。對來in叔兜7年久，伊兩个小妹妝thāⁿ媠媠閒閒，伊攏毋捌傾分，家己逐日認職理家。

這時拄著太子欲娶某，召通國的在室女，著來予伊請。彼霎in兩个小妹坐車欲去赴太子的筵席。塗炭仔共in嬸稟伊也愛去；in嬸佮伊兩个小妹攏嫌伊講，「你這扮也敢thí開喙講欲去，真袂見笑leh！。」予in嬸佮兩個小妹責備，面紅紅就閣入去塗炭間，目屎ná落雨，總是毋敢哮出聲。

忽然有一張馬車坐一个真老的婦人人來，問寶善講，「哮啥事？我是你的祖媽知你的艱苦，taⁿ你也通去赴太子的筵席。」就將柺仔loa̍h寶善的身軀，即時變做穿真媠的絲綢；也用柺仔拍兩塊石，即時變做一雙玉鞋，就吩咐伊講，「你去著毋通過12點轉來。」寶善拜謝祖媽坐車就去。總是彼時人攏已經teh啉食lah！

太子看見寶善喜出望外，本身the̍h好物予伊食，食半熟了，看見teh欲12點，寶善就起身出去；真久攏無閣來。太子真憂悶，四界攏揣無，也毋知伊的姓名住址，後來看見桌腳一雙玉鞋，就將玉鞋差欽差去逐所在予在室女的查某囡仔穿，若穿拄好彼个就是太子妃。欽差領旨即時去。

彼霎寶善轉來到厝猶未12點，衣裳猶原變做佮舊時同，in嬸攏毋知伊去赴太子的筵席。伊兩個小妹到4點正轉來，就共in娘講，「今仔日看見一个真媠，比仙女贏過真濟。」寶善佇塗炭間àⁿ頭出來看講，「你這个ná鬼，也teh袂見笑。」紲無意無意閣勼入塗炭間。

隔日欽差來到in兜，叫若有在室女攏著來試穿玉鞋，穿若拄好，就是做太子妃。寶珠，寶玉看著玉鞋較細，就佇內面斬一塊跤掌，緊緊將布紮好，就欲來穿。欽差看見講，「毋通拍lâ-sâm玉鞋，因為你的跤毋是自然的猶欲流血leh。」寶善佇內面也欲出來穿。In嬸佮寶珠，寶玉攏罵伊，「你袂見笑也敢出去穿。」欽差聽見講，「毋通分別媠bái，干焦取穿會合跤，著來穿。出來一下穿拄拄合跤。欽差連鞭拜伊做小主母。

頂面所記雖然是小說，iáu-kú有通做咱的教示；因為耶穌捌講，「愛欲做大，著做人的差用；又閣自高--的會降落做細。」